Prezıdent qazaqstandyq áıelder qaýymyn Halyqaralyq áıelder kúnimen quttyqtady
ASTANA. KAZINFORM – Memleket basshysy Qasym-Jomart Toqaev qazaqstandyq áıelder qaýymyn Halyqaralyq áıelder kúnimen quttyqtady. Bul týraly Aqordanyń baspasóz qyzmeti jazdy.
Qymbatty hanymdar!
Sizderdi Halyqaralyq áıelder kúnimen shyn júrekten quttyqtaımyn! Sulýlyq pen úılesimdi aıshyqtaıtyn shýaqty kóktem merekesinde biz barsha asyl jandarǵa erekshe qurmet kórsetip, yqylas-iltıpat bildiremiz.
Sizder túrli salada jemisti eńbek etip, elimizdi órkendetýge belsendi atsalysyp kelesizder. Kez kelgen sharýaǵa jaýapkershilikpen qarap, árbir istiń berekesin arttyrýǵa uıytqy bolyp júrsizder. Ardaqty analar búkil sanaly ǵumyryn balasynyń bolashaǵyna arnap, óskeleń urpaqqa tálim-tárbıe berip otyr. Osy mártebeli mıssııasyn kásibı qyzmetimen jáne qoǵamǵa paıdaly jumystarmen birge atqaryp júrgen arýlar da az emes. Áıelderge jan-jaqty jaǵdaı jasaý, olardyń quqyǵyn qorǵaý jáne otbasy ınstıtýtyn nyǵaıtý – memlekettik saıasattyń negizgi basymdyǵy.
Elimizdiń qyz-kelinshekteri jasampazdyq qasıetimen qoǵamnyń qundylyqtar júıesin jańartýǵa jáne Ádiletti Qazaqstandy qurýǵa ólsheýsiz úles qosa beredi dep senemin. Kóktem merekesi kóńilderińizge shattyq syılasyn! Barshańyzǵa baq-bereke jáne tolaǵaı tabys tileımin!
