Prezıdent Qazaqstandaǵy «Shell» kontserniniń 30 jyldyǵyna arnalǵan saltanatty jıynǵa qatysty
Memleket basshysy Qazaqstandaǵy «Shell» kontserniniń 30 jyldyǵyna arnalǵan saltanatty jıynǵa qatysty, dep habarlaıdy QazAqparat Aqordanyń resmı saıtyna silteme jasap.
Qasym-Jomart Toqaev halyqaralyq «Shell» energetıkalyq kontserni elimizdiń munaı-gaz ónerkásibi salasyndaǵy alǵashqy sheteldik ınvestorlardyń biri ekenin atap ótti. Prezıdenttiń aıtýynsha, «Shell» kontserniniń Qazaqstandaǵy qyzmetiniń 30 jyldyǵy sala tarıhyndaǵy mańyzdy kezeń sanalady.
– Qıyn-qystaý jyldary «Shell» ekonomıkamyzǵa qomaqty ınvestıtsııa quıyp, jańa tehnologııa, ǵylymı jetistikter men basqarýdyń baǵa jetpes tájirıbesin ákeldi. Biz kompanııanyń bul eńbegin joǵary baǵalaımyz. Sońǵy 30 jylda «Shell» el ekonomıkasyna 18 mıllıard dollardan astam ınvestıtsııa salyp, Qazaqstandaǵy eń iri sheteldik ınvestorlardyń biri retindegi pozıtsııasyn nyǵaıtty, – dedi Memleket basshysy.
Prezıdent «Shell» kontserni basqa da seriktestermen birge elimizde aýqymdy munaı-gaz jobalaryn belsendi júzege asyryp jatqanyn atap ótti. Kompanııa álemdegi eń iri munaı-gaz kondensaty ken oryndarynyń biri – Qarashyǵanaqtyń operatory sanalady. Qarashyǵanaqty keńeıtý jobasynyń kezeńderin ýaqtyly iske asyrý suıyq kómirsýtegin óndirýdi 10-11 mıllıon tonna deńgeıinde saqtaýǵa yqpal etedi.
– «Shell» kontserniniń jáne basqa da aktsıonerlerdiń úılesimdi jumysy Qashaǵannyń «ǵasyr jobasyn» iske qosýǵa múmkindik berdi. Búginde Soltústik Kaspıı jobasy jahandyq energııa naryǵynda mańyzdy ról atqarady jáne elimizdegi munaı óndirisiniń 20 paıyzyn qamtıdy. Kómirsýtegin óndirýden basqa, olardy álemdik naryqtarǵa tasymaldaý úshin ınfraqurylym qurýdyń mańyzy zor. Bul baǵyttaǵy alǵashqy tabysty joba – Kaspıı qubyr konsortsıýmy. Ony júzege asyrýǵa «Shevron», «ENI», «Shell», «Lýkoıl» jáne taǵy basqa jetekshi munaı kompanııalary qatysty, – dedi Prezıdent.
Memleket basshysy Qazaqstanda transulttyq munaı-gaz korporatsııalarynyń eńbek etýi elimizdiń joǵary ınvestıtsııalyq tartymdylyǵyn kórsetetinin, sonyń ishinde ınvestorlardyń quqyqtary men múddelerin qorǵaý baǵytyndaǵy zańnamanyń turaqty saqtalatynyn aıtty.
Qasym-Jomart Toqaev kompanııanyń áleýmettik jaýapkershiligine arnaıy toqtaldy
«Shell» óz jobalarynda jumysqa jergilikti kadrlardy tartýǵa aıryqsha mán beredi. Búginde Qarashyǵanaq jáne Qashaǵan jobalarynda jumys isteıtin qyzmetkerlerdiń 95 paıyzdan astamy – Qazaqstan azamattary. Sondaı-aq atalǵan kontsern «Kún energııasy – mektepterge», «Shell eko-marafony» jáne basqa da jobalardy júzege asyra otyryp, ekologııalyq máselelerdi sheshýge jastardy belsendi tartady.
Prezıdent óziniń jýyrdaǵy Joldaýynda shaǵyn jáne orta bıznesti damytýǵa erekshe nazar aýdarǵanyn eske saldy. Onyń pikirinshe, «Shell» bul máseleni sheshýge áleýmettik turǵydan osal sanattaǵy jas kásipkerler men áıelderdi qoldaý baǵdarlamalary arqyly eleýli úles qosady. Kompanııa olarǵa bınes ashý úshin keńes berý qyzmetteri men bastapqy kapıtaldy usynady. Memleket basshysy kontsernniń osy baǵyttaǵy qyzmetin keńeıtý úshin mol áleýet bar ekenin atap ótti.
– Otandyq kásipkerlermen kezdesýde jergilikti ınjenerler men kompanııalardy mindetti túrde tarta otyryp, jobalyq dızaın keńselerin Qazaqstanǵa kóshirýge járdemdesýdi tapsyrdym. Jergilikti ónim úlesin arttyrý úshin óndirýshilerimizge iri munaı-gaz jobalaryn iske asyrýǵa jol ashý mańyzdy. «Shell» kontserniniń belsendi jáne konstrýktıvti ustanymy Qazaqstan ekonomıkasyn ártaraptandyrýǵa eleýli úles qosyp, kompanııanyń ımıdjin odan ári jaqsartatynyna senimdimin, – dedi Qasym-Jomart Toqaev.
Memleket basshysy sóziniń sońynda elimizdiń órkendeýine jáne ornyqty damýyna zor úles qosqany úshin kompanııaǵa shynaıy rızashylyǵyn bildirip, «Shell» kontserni Qazaqstannyń energetıka salasyndaǵy strategııalyq seriktesteriniń biri ekenin atap ótti.
Qasym-Jomart Toqaev kompanııanyń birqatar qyzmetkerin Qazaqstannyń munaı-gaz salasyn damytýǵa sińirgen erekshe eńbegi úshin memlekettik nagradalarmen marapattady.
Atap aıtqanda, Qazaqstandaǵy «Shell» kontserni tóraǵasynyń orynbasary Quralbek Keljanov III dárejeli «Barys» ordenimen, memlekettik organdarmen baılanys jónindegi menedjer Dııas Jubandyqov «Qurmet» ordenimen, eńbek resýrstary jáne servıstik qamtamasyz etý jónindegi dırektor Sulýshash Іzbasarova jáne ken oryndaryn ıgerý jónindegi menedjer Ǵadilbek Óksikbaev «Eren eńbegi úshin» medaldarymen marapattaldy.
