Prezıdent: Qazaqstanda ózbek kapıtalynyń qatysýymen 6 myńnan asa kásiporyn tabysty jumys isteıdi

TAShKENT. KAZINFORM – Memleket basshysy ónerkásip, avtokólik shyǵarý, qurylys sektory, energetıka salalarynda sońǵy jyldary aıtarlyqtaı tabysqa qol jetkenin atap ótip, taraptar bul baǵyttaǵy yntymaqtastyqty kezeń-kezeńimen keńeıtý jumystaryn jalǵastyrýǵa keliskenine toqtaldy. Bul týraly Aqordanyń baspasóz qyzmeti habarlady. 

— Aýyl sharýashylyǵy salasyndaǵy baılanystardy nyǵaıtý basym mindet retinde belgilendi. Atalǵan baǵytty óristetýge Qazaqstan men Ózbekstannyń jetkilikti resýrstary bar, ónerkásip jáne kadr áleýeti de joǵary. Elderimiz óz múmkindikterin biriktirý arqyly óńirdiń azyq-túlik qaýipsizdigin qamtamasyz etip, álemdik naryqtaǵy ornyn kúsheıte alady. Agroónerkásip keshenindegi birqatar joba, sonyń ishinde bıdaı men et-sút ónimderin óńdeý máseleleri pysyqtalýda. Agrosektordaǵy birlesken jobalarǵa jan-jaqty qoldaý kórsetýge kelistik, — dedi Prezıdent.

Qasym-Jomart Toqaevtyń aıtýynsha, iskerlik toptar arasyndaǵy baılanystardy odan ári keńeıtý qajet.

— Qazaqstanda ózbek kapıtalynyń qatysýymen 6 myńnan asa kásiporyn tabysty jumys isteıdi. Biz osy baǵyttaǵy yntymaqtastyqty arttyrýǵa, ózbek bıznesiniń órken jaıýyna qolaıly jaǵdaı jasaýǵa daıynbyz. Óńirler arasyndaǵy yqpaldastyqtyń kúsheıýi — oń úrdis. Burynǵy Óńiraralyq forým Óńir basshylarynyń keńesi retinde qaıta qurylyp, udaıy qyzmet atqarady. Bul sheshim bizdiń nıetimiz ben osy qurylymǵa artqan úmitimizdiń qanshalyqty salmaqty ekenin baıqatady, — dedi Memleket basshysy. 

Aıta ketelik prezıdentter kelissózderdiń jáne Qazaqstan men Ózbekstan Joǵary memleketaralyq keńesi ekinshi otyrysynyń qorytyndysy boıynsha Birlesken málimdeme qabyldaǵan edi.