Prezıdent: Qazaqstanda kúzde Astana AI Film Festival halyqaralyq baıqaýy ótedi
ASTANA. KAZINFORM – Memleket basshysy kúzde elimizde Astana AI Film Festival atty taǵy bir mańyzdy halyqaralyq baıqaý uıymdastyrylatynyn aıtty. Bul týraly Aqordanyń baspasóz qyzmeti habarlady.
– Bul kreatıvti ındýstrııanyń damýyndaǵy irgeli ózgeristerdi kórsetetin jahandyq deńgeıdegi alǵashqy is-shara bolmaq. Jasandy ıntellekt shyǵarmashylyq tabıǵatyna túbegeıli betburys ákeledi, ózin tanytýdyń jańa formalaryn ashady ári talanttardyń aldynan shyǵatyn kedergilerdi azaıtady. Qazaqstan osy jahandyq jańashyldyqtardyń bel ortasynda bolýǵa umtylady. Sonymen qatar jasandy ıntellekt áserinen kreatıvti ındýstrııa joıylady, qazirgi kúıinde saqtalmaıdy degen pessımıstik boljamdardy eskerý kerek. Sondyqtan barlyq úrdisti baqylap, ózgeristerge der kezinde beıimdelý qajet. Festıvaldi uıymdastyrý Qazaqstandy halyqaralyq arenadaǵy ınnovatsııalar men jasampaz bastamalar ortalyqtarynyń biri retinde kórsetý úshin óte mańyzdy, - dedi Prezıdent.
Qasym-Jomart Toqaev tsıfrlandyrý jáne jasandy ıntellektini jappaı engizý úderisi aýqymdy ózgeristerge jol ashqanyn aıtty.
– Sondyqtan biz azamattardyń áleýetin arttyrýǵa, olarǵa tsıfrlyq daǵdylardy úıretýge basa mán berip otyrmyz. Búginde 650 myńnan astam stýdent Al Sana baǵdarlamasymen bilim alyp jatyr. Aldaǵy ýaqytta jasandy ıntellekt jáne deeptech-tehnologııasyna qatysty taǵy da 100 myń maman daıarlaýymyz kerek. Bıyl elimizde jańa úlgidegi tehnologııalyq bilim ordasy – Jasandy ıntellekt ýnıversıteti ashylady. Bul ǵylym salasy úshin mańyzdy oqıǵa bolmaq. Endi aldymyzda turǵan ózekti mindet: biz osy salada bilikti maman daıarlaý isine erekshe kóńil bólýimiz kerek. Daryndy jastardy tartyp, olarǵa sapaly bilim berý qajet. Sondaı-aq keleshegi zor tehnologııalyq jobalar men kompanııalarǵa qoldaý kórsetý aıryqsha mańyzdy. Osyndaı júıeli jumystyń nátıjesi de elimiz úshin tıimdi bolary anyq, - dedi Memleket basshysy.
Eske salsaq, buǵan deıin Memleket basshysy Alem.ai battle jáne AI Governance Cup baıqaýlarynyń jeńimpazdaryn marapattaý rásiminde sóz sóılegenin jazǵan edik.
