Prezıdent Qazaqstanda qurylys quny qalaı qymbattaıtynyn taldap berdi

NUR-SULTAN. QazAqparat – QR Prezıdenti Qasym-Jomart Toqaev nysandar qurylysynda jobalaýdy qymbattatýǵa jol bermeýdi tapsyrdy, dep habarlaıdy QazAqparat tilshisi.

Jobalar qunynyń eleýli túrde qymbattaýy tájirıbesi jalǵasyp kele jatqanyna toqtalǵan Prezıdent, «Qurylystyń smetalyq qunyn qalyptastyrý problemasy bar. Bul barlyq deńgeıdegi bıýdjetteriniń aýqymdy shyǵys bóligi bolyp otyr. Materıaldarǵa, mashına jáne mehanızmder jumysyna, tehnologııalyq kartalar men basqa da sharalarǵa baǵanyń qalyptasýynyń ashyqtyǵy joq. Atap aıtqanda, bul qadamdar qurylys qunyn esepteýdiń bastapqy núktesi bolyp sanalady. Keıinnen Qazaqstanda qurylys nege qymbat ekenine tańdanamyz».

Memleket basshysynyń sózine qaraǵanda, elimizde 14 myńnan astam jobalyq uıym, 126 sarapshylyq uıym bar.

«Tehnıkalyq-ekonomıkalyq negizdeme men jobalyq-smetalyq qujatnamany ázirleý, saraptamadan ótý qurylystyń jalpy somasynan 4 paıyzdan astam qarjyny quraıdy. Mine, rezerv qaıda jatyr. Jyl saıyn ondaǵan mıllıard teńgeni tek jobalyq-smetalyq qujatnamaǵa jumsaımyz. Sonymen birge, birdeı nysandardyń qunynda eselengen aıyrmashylyq bolýy múmkin», - dedi Qasym-Jomart Toqaev.

Osy oraıda Prezıdent Úkimetke ónimsiz shyǵyndardy tómendetý boıynsha tıisti sharalardy qabyldaýdy tapsyrdy.