Prezıdent: Qazaqstanda elektr energııasynyń quny arzandaýy tıis

ASTANA. QazAqparat - Prezıdent Nursultan Nazarbaev Energetıka mınıstrligine tutynýshylar úshin elektr energııasynyń qunyn arzandatýdy tapsyrdy, dep habarlaıdy QazAqparat.

«Biryńǵaı satyp alýshynyń modelin engizý men óńirlik elektr jelilik kompanııalardy irilendirý josparlanýda. Energetıka mınıstri bul sharalar jaqsy nátıje beretinin, tutynýshy úshin elektr energııasy qunyn tómendetetinin baıandaǵan bolatyn. Alaıda buǵan qol jetken joq», - dedi Prezıdent QR Energetıka mınıstri Qanat Bozymbaevqa qaratyp aıtqan sózinde.

Óz kezeginde mınıstr energııa qýaty naryǵynda biryńǵaı satyp alýshy anyqtalǵanyn atap ótti. 2019 jyldyń 1 qańtarynan naryqty iske qosý úshin 2017 jyly qajetti jumystar daıarlandy.

«Biryńǵaı satyp alýshy retinde «KEGOK» AQ-nyń esepteý-qarjylyq ortalyǵy aıqyndaldy. Bıyl barsha elimiz boıynsha eki jattyǵý sharalaryn ótkizbekpiz, ıaǵnı naqty ýaqyt rejiminde qýat naryǵynyń jumysyn baǵalaımyz»,- dep túsindirdi Bozymbaev.

Sonymen qatar vedomstvo basshysy energııa taratatyn uıymdardy irilendirý tetigi de anyqtalǵanyn jetkizdi.

 «2018 jyly energııa beretin uıymdarda dıspetcherlik basqarý beketi bolýy tıis. Osy oraıda biz onyń barlyǵyn tekserip shyǵamyz. Al osyndaı beketteri joq kompanııalardy jabamyz. (...) Biliktilik talaptaryn oryndamaıtyn uıymdarǵa sharalar qabyldanady. Sonymen qatar tarıfti azaıtýǵa qaraı qaıta qarastyrý sharalary eskerilgen. Osy arqyly, olar ózge óńirlik elektr jelilik kompanııalarmen irilenýi úshin yntalandyrý bolady», - dep túsindirdi mınıstr.

Onyń sózine qaraǵanda, nátıjesinde, energııa taratatyn uıymdar 30 paıyzǵa qysqarady, ıaǵnı 160-tan 110-ǵa deıin. Bul óz kezeginde atalǵan uıymdardyń shyǵyndaryn ońtaılandyrýǵa múmkindik beredi. Birinshi kezekte, túrli basshylar, kontrollerler azaıady.

«Biraq ta bul jumystar tıisti ýaqytty qajet etedi. 2017 jyly úsh energııa taratatyn kásiporyn jumysyn toqtatty, 2018 jyly 27 kompanııa óziniń qyzmetin doǵarady», - dep naqtylady mınıstr.

Qanat Bozymbaevtyń baıandamasynan keıin Prezıdent Nursultan Nazarbaev tıisti tapsyrmany júktedi.

«Saladaǵy jaǵdaıdy egjeı-tegjeıli baıandap berdiń, alaıda atalǵan jumystyń nátıjesinde óńirler arasynda tarıfter aıyrmashylyǵy yńǵaılanýy kerek. Sonymen qatar tutynýshylar úshin elektr energııasysynyń quny tómendeýi qajet», - dep túıdi Memleket basshysy.