Prezıdent Qazaqstanda bıznes júrgizýdiń buljymas sharttaryn atady

ASTANA. QazAqparat – Prezıdent Qasym-Jomart Toqaev «Altyn sapa» jáne «Paryz» syılyqtarynyń ıegerlerin marapattaý saltanatynda sóılegen sózinde Qazaqstanda bıznes júrgizýdiń buljymas sharttaryn atady, dep habarlaıdy QazAqparat tilshisi.

«Kásipkerlerdi qorǵaýda Bas prokýratýraǵa, «Atameken palatasyna» jáne Kásipkerlerdiń quqyqtaryn qorǵaý jónindegi ýákilge aıryqsha ról berilip otyr. Óz kezeginde bıznes te parasatty jumys istep, zańnamany múltiksiz saqtaýy kerek. Bul óte mańyzdy», - dedi Memleket basshysy.

Qasym-Jomart Toqaevtyń aıtýynsha, bıznestiń parasaty mynandaı uǵymdarmen tyǵyz baılanysty.

«Naryqtyq básekelestik, tutynýshylardyń quqyqtaryn qorǵaý, salyq adaldyǵy bizdiń elde bıznes júrgizýdiń ajyramas shartyna aınalýy kerek», - dedi Prezıdent.

Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sııaqty kásipkerlik baǵyttaǵy marapattar da tabystaldy.

Sondaı-aq, «ArýAna», «Bıznes Kemeldilik», «Іsker», «Uly dala eli» syılyqtarynyń jeńimpazdary da marapattaldy.

Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.