Prezıdent: Qazaqstanda alǵashqy frantsýz bankiniń ashylýyn qýana quptar edik
Prezıdent elimizdiń Transkaspıı halyqaralyq kólik baǵytyn nemese «Orta dálizdi» damytýǵa barynsha kúsh salyp otyrǵanyna nazar aýdardy, dep habarlaıdy Kazinform Aqordanyń baspasóz qyzmetine silteme jasap.
«Bul – Eýropa men Azııa arasyndaǵy senimdi jetkizý tizbegin qamtamasyz etetin eń qysqa ári anaǵurlym ómirsheń baǵdar. Tasymal kólemi ósip keledi. Sondyqtan biz jyl saıynǵy júk tasymalyn 10 mıllıon tonnaǵa deıin jetkizý úshin seriktesterimizben birge ınfraqurylymdy jańǵyrtý jumystaryna belsendi kiristik. Endi bul baǵyttaǵy is-áreketimizdi Transeýropalyq kólik jelisimen jáne Eýropa Odaǵynyń «Jahandyq qaqpa» bastamasymen ushtastyrý mańyzdy», – dedi Qasym-Jomart Toqaev.
Memleket basshysynyń pikirinshe, bıotehnologııa jáne medıtsına salalaryndaǵy yntymaqtastyqty jolǵa qoıý úshin múmkindik mol. Bıotehnologııa klasterin damytý maqsatynda Ulttyq «QazBioPharm» bıofarmatsevtıkalyq holdıngi quryldy. Prezıdent kóptegen jetekshi kompanııalar Qazaqstanda dári-dármek pen medıtsınalyq qurylǵy óndirisin damytýdy josparlap otyrǵanyn atap ótip, frantsýz kompanııalaryn da osy baǵyttaǵy yqpaldastyqqa shaqyrdy.
Qasym-Jomart Toqaev sózin qorytyndylaı kele, «Astana» halyqaralyq qarjy ortalyǵynyń ınvestıtsııa tartý isindegi artyqshylyqtaryna toqtaldy.
«Búginde álemniń 78 elinde bazasy bar 2100-den astam kompanııa AHQO-da jumys isteıdi. Olar tek Qazaqstanǵa ǵana emes, búkil óńirge ınvestıtsııalyq kapıtal tartýǵa yqpal etip otyr. Biz AHQO-daǵy frantsýz kompanııalarynyń sany artýyn jáne Qazaqstanda alǵashqy frantsýz bankiniń ashylýyn qýana quptar edik. Bul qadam bizdiń ınvestıtsııa jáne qarjy salalaryndaǵy yntymaqtastyǵymyzǵa tyń serpin beredi», – dedi Prezıdent.
