Prezıdent: Qazaqstanda adamdy ultyna, tiline, dinine qaraı kemsitý eshqashan bolmaǵan
ASTANA. KAZINFORM — Prezıdent Qasym-Jomart Toqaev Qazaqstan halqy Assambleıasynyń HHHІV sessııasynda etnos teatrlarynyń festıvalin ótkizýdi usyndy.
— Qazaqstanda adamdy ultyna, tiline, dinine qaraı kemsitý eshqashan bolǵan emes, bolmaıdy da. Barsha azamattarǵa birdeı múmkindik berilgen. Bul — naǵyz ádildik, ádiletti memlekettiń ajyramas bóligi. Taǵy da aıtarym: eldiń birligi men tatýlyǵy eń negizgi qundylyqtarymyzdyń qatarynda tur. Bul — memlekettik saıasattyń basty tuǵyry. Bolashaqta da solaı bolmaq. Osy strategııanyń arqasynda túrli etnos ókilderi bir shańyraqtyń astynda bir úıdiń balasyndaı tatý-tátti ómir súrip jatyr. Bul — maǵynasy tereń naqty jetistik. Otanshyldyq, azamatshyldyq, ózara senim men jaýapkershilik — Qazaqstan halqynyń jalpyulttyq biregeı bolmysyn aıqyndaıtyn qundylyqtar. Qazaq jerinde turyp jatqan barlyq etnos ókilderi ózderiniń tilin, mádenıetin jáne salt-dástúrlerin jan-jaqty damyta alady, — dedi Memleket basshysy.
Aıtýynsha, buǵan qajetti barlyq jaǵdaı jasalǵan.
— Biz bireýge eliktep, jan-jaǵymyzǵa jaltaqtaǵan emespiz. Eń bastysy, ultaralyq qatynastar salasynda ozyq ádis-tásilderdi qoldanyp, tek alǵa qaraı júrdik, bolashaqta da solaı bolý kerek. Sonyń arqasynda bizdiń elimizde qalyptasqan qoǵamdyq kelisim úlgisi shyn máninde bizdiń halyqaralyq «brendimizge», betkeustar jetistigimizge aınaldy. Etnosaralyq qatynastar men ulttyq birliktiń búkil qurylymy «Biz — ártúrlimiz, biraq bárimiz teńbiz» degen myzǵymas qaǵıdaǵa negizdelgen, — dedi Qasym-Jomart Toqaev.
Prezıdent azamattardyń ultyna, dinı nanymyna nemese áleýmettik mártebesine qaramaı, bárine birdeı ádil ári teń jaǵdaı jasaý memlekettik saıasattyń basty ustanymy ekenin eske saldy.
— Biz popýlıstik asyǵys sheshimderden boıymyzdy aýlaq ustaımyz. Árqashan naqty jaǵdaıǵa qarap, baıypty saıasatty basshylyqqa alamyz. Bul, eń aldymen, memlekettik tildiń mártebesin etnosaralyq qatynas tili retinde bekitý máselesine tikeleı qatysty, — dedi Qasym-Jomart Toqaev.
Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr. Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».
Budan buryn Prezıdent QHA-ny damytýdyń jańa tujyrymdamasyn ázirleýdi tapsyrdy.
Sonymen qosa Toqaev Assambleıa sessııalarynda qabyldanǵan sheshimderdi memorgandar mindetti túrde eskerýge tıis ekenin basa aıtty.