Prezıdent: Qazaqstan úshin sý — ulttyq qaýipsizdik máselesi

ASTANA. KAZINFORM — Memleket basshysy Qasym-Jomart Toqaev Aqordada sý sharýashylyǵy qyzmetkerlerin memlekettik nagradalarmen marapattaý rásiminde Qazaqstan úshin sý — ulttyq qaýipsizdik máselesi ekenin atap ótti. 

— Búgin — sý sharýashylyǵy qyzmetkerleriniń kúni. Aldymen sizderge kásibı merekelerińiz qutty bolsyn degim keledi. Barshańyzdy quttyqtaımyn. Sý — búkil tirshiliktiń kózi. Sýsyz ómir joq ekenin bárimiz de bilemiz. Sý — álemdegi barlyq el úshin asa mańyzy strategııalyq resýrs. Bizdiń keń baıtaq jerimiz bar. Alaıda, el aýmaǵynyń jartysynan kóbi shól jáne shóleıt jerler. Sondyqtan Qazaqstan úshin sý máselesi ulttyq qaýipsizdik máselesi desek, artyq bolmaıdy, — dedi Prezıdent.

Memleket basshysy sý sharýashylyǵy salasy árdaıym memlekettiń aıryqsha nazarynda ekenin basa aıtty.

— 2023 jyly halyqqa Joldaýymda men sýdy tıimdi paıdalaný jaıyna erekshe toqtaldym. Elimizde Sý resýrstary jáne ırrıgatsııa mınıstrligi quryldy. Naqty mindetter aıqyndalyp, aýqymdy reformalar qolǵa alyndy. Jańa sý kodeksi qabyldandy. Іri ınfraqurylymdyq jobalar júzege asyrylyp jatyr. Sý nysandaryn salýǵa jáne qalpyna keltirýge qomaqty qarajat bólindi. Shetelden ınvestıtsııa tartylýda, — dedi Qasym-Jomart Toqaev.