Prezıdent: Qazaqstan ulttyq strategııany júzege asyryp, turaqty ekonomıkalyq ósimge qol jetkizdi
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda Qazaqstan bıyl álemdegi ekonomıkasy iri 50 eldiń qataryna kirgenin, sondaı-aq elimiz Ortalyq Azııada sheteldik ınvestıtsııa tartýda kósh bastap turǵanyn sóz etti.
– Qazir álemdegi saıası-ekonomıkalyq ahýal asa kúrdeli bolyp ketkenin kórip otyrsyzdar. Áskerı qaqtyǵystar, «saýda soǵysy» jyldan jylǵa ýshyǵyp barady. Bul álemdegi iri memleketter arasyndaǵy ózara senim daǵdarysynyń, olardyń halyqaralyq qaýymdastyq aldyndaǵy jaýapkershilikti elep-eskermeýiniń nátıjesi dep aıtýǵa negiz bar. Munyń bári elimizdiń múmkindikterin shektep otyr. Biraq soǵan qaramastan, biz ulttyq strategııamyzdy tabandy túrde ári birtindep júzege asyryp jatyrmyz. Barlyq syn-qater men qıyndyqty eńserip, turaqty damyp kelemiz. Byltyr Qazaqstannyń jalpy ishki ónimi 306 mıllıard dollar boldy. Bul – Táýelsiz Memleketter Dostastyǵy elderi arasyndaǵy ekinshi oryn, al osy aımaqtaǵy elder arasyndaǵy eń úlken kórsetkish. Sonyń nátıjesinde biz bıyl álemdegi ekonomıkasy asa iri 50 eldiń qataryna qosyldyq. Bedeldi halyqaralyq uıymdar men qarjy ınstıtýttarynyń boljamyna sáıkes bıyl osy kórsetkish 320 mıllıard dollar bolady. Shetelden tartylǵan taza ınvestıtsııa kólemi boıynsha Qazaqstan Ortalyq Azııada kósh bastap tur, ıaǵnı 150 mıllıard dollardan astam qarajat tartyldy. Bul – Ortalyq Azııadaǵy tikeleı shetel ınvestıtsııasynyń 69 paıyzy degen sóz. Elimizdiń altyn-valıýta qory – 74 mıllıard dollarǵa, al jalpy jınaqtalǵan qor 139 mıllıard dollarǵa jetti. Bir sózben, ulttyq ekonomıkamyz jalpy turaqty túrde ósip keledi. Eń mańyzdysy, muny sapaly ósim deýge bolady, - dedi Qasym-Jomart Toqaev.
Buǵan deıin Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda sóz sóılegenin jazǵanbyz.
