Prezıdent: Qazaqstan – UQShU-nyń tolyqqandy quryltaıshysy

NUR-SULTAN. QazAqparat –QR Prezıdenti Qasym-Jomart Toqaev Parlament Májilisiniń otyrysynda UQShU týraly shetelde tarap jatqan jańsaq pikirdiń aldyn alý kerektigin atady, dep habarlaıdy QazAqparat tilshisi.

«Ujymdyq qaýipsizdik týraly shart uıymyna jeke toqtalǵym keledi. Buǵan qatysty túrli qaýessettiń, ásirese, shetelde tarap jatqan jańsaq pikirdiń aldyn alý qajet. Bul uıym ujymdyq qaýipsizdik máselelerimen aınalysady. Qazaqstan onyń tolyqqandy quryltaıshysynyń biri. Osy uıymnyń barlyq múshelerinen jasaqtalǵan bitimgershilik kontıngenti Qazaqstanǵa ýaqytsha merzimge ǵana keldi», - degen Prezıdent uıymǵa júktelgen mindetter naqty aıqyndalǵanyn basa aıtty.

«Lańkesterge qarsy operatsııany tolyǵymen Qazaqstannyń kúshtik qurylymdary júzege asyrýda. Shyn máninde solardyń jankeshti is-áreketiniń arqasynda tóńkeriske jol berilgen joq», - dedi Qasym-Jomart Toqaev.

Eske salsaq, QR Prezıdenti Qasym-Jomart Toqaev Parlament Májilisiniń otyrysynda QR Premer-Mınıstri laýazymyna Álıhan Smaıylovtyń kandıdatýrasyn usynyp , ony Májilis qabyldady.

Prezıdent jýyqta Qazaqstandy saıası transformatsııalaý jónindegi jańa usynystaryn jarııalaıtynyn aıtqan.

Sondaı-aq, ol 7 qańtarda halyqqa jasaǵan úndeýinde Úkimetke búgingi Májilis otyrysynda natqy tapsyrmalar beretinin aıtqan edi.

«Úkimet meniń 11 qańtarda Májiliste aıtatyn sózime qatysty naqty sheshimder qabyldaýy kerek», -degen Memleket basshysy.