Prezıdent: Qazaqstan tsıfrlyq derjavaǵa aınalýy kerek
ASTANA. KAZINFORM – Qazaqstan tsıfrlyq derjavaǵa aınalýy kerek. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
– Qazaqstan tsıfrlyq derjavaǵa aınalýy kerek. Bul – qazirgi jańa tehnologııa dáýirinde órkenıetti el bolyp qalýdyń birden-bir joly. Halqymyzdyń oı-sanasy mundaı ınnovatsııalarǵa daıyn ekenine senimdimin. Onyń ústine, Qazaqstanda azamattarymyzdyń ómir saltyn edáýir ózgertken tanymal fınteh kompanııalar tabysty jumys istep jatyr, - dedi Memleket basshysy.
Prezıdent tehnologııa salasyndaǵy naǵyz álemdik alpaýyttar – AQSh pen Qytaı arasyndaǵy báseke qyza túskenin atap ótti.
- Amerıka basshysy AQSh-tyń ústemdigin nyǵaıtý úshin arnaıy baǵdarlama júzege asyryla bastaǵanyn málimdedi. Qytaıdyń da sheginetin oıy joq, olar muny ulttyń abyroı-bedeline qatysty másele dep sanaıdy. Qazirdiń ózinde Qytaıda jasandy ıntellekt máselesimen aınalysatyn bes myńǵa jýyq kompanııa jumys istep jatyr. Basqa damyǵan memleketter de qamsyz otyrǵan joq, - dedi Qasym-Jomart Toqaev.
Memleket basshysynyń aıtýynsha, Qazaqstan da ekonomıka men qoǵamdyq ómirge jasandy ıntellektini engizýge basymdyq berip jatyr.
- Elimizdiń bul jumysqa qatysty bastapqy múmkindikteri jaman emes. Memleket kórsetetin qyzmetterdi, qarjy tehnologııalaryn, ekonomıkanyń birqatar sektoryn tsıfrlandyrý isinde naqty jetistikterimiz bar. ІT-startaptardy qoldaıtyn tolyqqandy ekojúıe tıimdi jumys istep tur. Eki myń kompanııanyń basyn qosqan Astana Hub ınnovatsııalyq klasteri de bar. 2025 jyly ІT-qyzmetterdiń jalpy eksporty bir mıllıard dollarǵa jýyqtady. Tsıfrlyq aktıvterge arnalǵan CryptoCity pılottyq aımaǵy qurylyp jatyr. Jedel damıtyn Alatau city qalasynyń qurylysy bastaldy. Memlekettik derekterdi jınaý jáne taldaý jumysynyń qarqyny kúsheıip keledi. Kásibı mamandar mundaı derekterdi aldaǵy dáýirdiń jańa altyny dep sanaıdy, - dedi Prezıdent.
Qasym-Jomart Toqaevtyń aıtýynsha, byltyr mamyr aıynda Jasandy ıntellektini damytý jónindegi keńes jumysyn bastady. Oǵan sheteldiń jáne elimizdiń bedeldi sarapshylary shaqyryldy. Qarashada «Jasandy ıntellekt týraly» zańǵa qol qoıyldy, jańa zań jaqynda kúshine enedi. Jasandy ıntellekt jáne tsıfrlyq damý mınıstrligi quryldy. Alem.Cloud jáne Al-Farabium dep atalatyn eki sýperkompıýter iske qosyldy, Astana ákimdigi Birikken Arab Ámirlikteriniń tanymal kompanııasymen birlesip, derbes platforma qurdy.
- Kásibı kadrlardy daıarlaý úshin mektepter men ýnıversıtetterde tıisti bilim berý baǵdarlamalary júzege asyrylyp jatyr. Máselen, 650 myńnan astam stýdent AI-Sana baǵdarlamasy aıasynda bilim aldy. Kóp uzamaı Jasandy ıntellekt mamandandyrylǵan zertteý ýnıversıteti ashylady. Jasandy ıntellekt paıda bolǵannan beri bolashaqtyń kemesine minip úlgeretin elder men eski zamanda qalyp qoıatyn elderdiń arasy alshaqtaı bastady. Sondyqtan, men tsıfrlyq tehnologııalar men jasandy ıntellektini Qazaqstannyń damý jolyndaǵy basym baǵyt dep jarııaladym. Bıyl óte kóp sharýa atqarylady. Osy aıryqsha mańyzdy jumystyń tabysty bolaryna senemin, - dedi Qasym-Jomart Toqaev.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.