Prezıdent: Qazaqstan terrorızm, separatızm jáne ekstremızmge qarsy kúsh biriktirýge daıyn
ASTANA. KAZINFORM — Prezıdent Qasym-Jomart Toqaev ShYU-ǵa múshe memleketter basshylary keńesiniń otyrysynda sóz sóıledi, dep habarlaıdy Aqordanyń baspasóz qyzmeti.
Memleket basshysy Sammıtti joǵary deńgeıde uıymdastyrǵany jáne tarıhy baı Tıantszın qalasynda jyly qarsy alǵany úshin QHR Tóraǵasy Sı Tszınpınge rızashylyq bildirdi.
— Qurmetti Sı Tszınpın myrza, Sizdi jáne barsha qytaılyq dostarymyzdy elderińizdiń Shanhaı yntymaqtastyq uıymyna tabysty tóraǵalyq etýimen quttyqtaımyn. Qazaqstan ShYU sheńberindegi qaýipsizdik pen turaqtylyqty, ekonomıkalyq yqpaldastyq jáne mádenı-gýmanıtarlyq baılanystardy nyǵaıtýǵa baǵyttalǵan Qytaıdyń sarabdal saıasatyn joǵary baǵalaıdy. Qytaıdyń japon basqynshylyǵyna qarsy kúrestegi jeńisiniń 80 jyldyǵy jáne Ekinshi dúnıejúzilik soǵystaǵy jeńistiń 80 jyldyǵy sekildi qos tarıhı mereıtoı qarsańynda ótip jatqan búgingi Sammıtke erekshe mán beremiz. Bul aıtýly datalar barsha adamzatqa jer betindegi halyqtyń berekeli ómir súrýine, birligi men yntymaǵyn arttyrýǵa qyzmet etýi qajet. Sondaı-aq tarıhı shyndyqty burmalaýǵa jol bermeı, óskeleń urpaqty patrıotızm rýhynda tárbıelep, shynaıy qundylyqtardy ustanýǵa úndeýi kerek, — dedi Prezıdent.
Qasym-Jomart Toqaev Shanhaı yntymaqtastyq uıymyn álemdik qaýymdastyq tıimdi, yqpaldy ári qajetti halyqaralyq qurylym retinde tanıtynyn atap ótti.
— Qazaqstan ShYU-nyń teńgerimdi kóppolıarli álemdik tártip ornatý, qaýipsizdik pen turaqtylyqty qamtamasyz etý, memleketterdiń ishki isine aralaspaý jáne egemendi damý quqyǵyn moıyndaý, sondaı-aq ádil halyqaralyq saýda men ózara tıimdi ınvestıtsııalyq yntymaqtastyq sekildi basty maqsattaryn tolyq qoldaıdy. Uıymnyń basym mindetteri jańa tehnologııalyq dáýirde halyqtarymyzdyń ál-aýqatyn, qaýipsizdigin jáne ornyqty damýyn qamtamasyz etýdi kózdeıdi. ShYU jarǵylyq qujattarynyń negizgi qaǵıdattaryn berik ustana otyryp, Qazaqstan «úsh zulymdyqqa», ıaǵnı, terrorızmge, separatızmge jáne dinı ekstremızmge qarsy kúreste kúsh-jiger biriktirýdi óte ózekti sanaıdy. Biz jahandyq beıbitshilik pen qaýipsizdik múddesi úshin halyqaralyq yntymaqtastyq nyshanyna aınalǵan «Shanhaı rýhyn» odan ári ilgeriletýdi qýattaımyz, — dedi Memleket basshysy.
Aıta keteıik, 30 tamyzda Prezıdent Qasym-Jomart Toqaev Shanhaı yntymaqtastyq uıymynyń sammıtine qatysý úshin Tıantszın qalasyna bardy.
Memleket basshysy QHR Tóraǵasy Sı Tszınpınmen kelissóz júrgizdi.
Keshe Prezıdent ShYU sammıtine qatysýshy elderdiń delegatsııa basshylary qurmetine uıymdastyrylǵan saltanatty qabyldaý rásimine qatysý úshin Tıantszındegi «Meıtszıan» konferents-ortalyǵyna barǵany belgili boldy.
Búgin sammıt qarsańynda ShYU-ǵa múshe memleketter basshylary keńesine qatysýshylar birge sýretke tústi.