Prezıdent «Qazaqstan temir joly» UK» AQ basqarma tóraǵasy Nurlan Saýranbaevty qabyldady

ASTANA. KAZINFORM – Qasym-Jomart Toqaevqa ulttyq kompanııa qyzmetiniń 2023 jylǵy negizgi nátıjesi jáne aldaǵy kezeńge arnalǵan jospary týraly esep berildi.

Nurlan Saýranbaevtyń aıtýynsha, sońǵy úsh jylda «Qazaqstan temir jolynyń» negizgi óndiristik kórsetkishterinde ósim baıqalady. Byltyr júk aınalymy 7 paıyzǵa artyp, 270 mıllıard tonna-kılometrge jetti. Tranzıttik tasymaldaý kólemi 18 paıyzǵa ulǵaıyp, 27 mıllıon tonnadan asty. Nátıjesinde kompanııanyń kirisi ótken jylmen salystyrǵanda 29,3 paıyzǵa ósip, 1,9 trıllıon teńgeni qurady. Kompanııa 154 mıllıard teńge taza paıda tapty. Bul 2022 jylmen salystyrǵanda tórt ese kóp ári kompanııanyń rekordtyq kórsetkishi sanalady.

Prezıdentke Dostyq – Moıynty, Almaty stantsııasyn aınalyp ótetin temirjol jelisin salý jáne basqa da iri ınfraqurylymdyq jobalardyń iske asyrylýy týraly baıandaldy. Búgingi tańda 350 shaqyrymnan astam jol tóselgen. Atalǵan jobalardyń iske qosylýy memleketaralyq túıisý pýnktteriniń ótkizý qabiletin arttyrady.

Sonymen qatar Memleket basshysyna Sıan qalasyndaǵy qurǵaq portta júk termınalynyń qurylysy aıaqtalǵany jóninde málimet berildi. Qytaıdyń eń iri logıstıkalyq habynda ornalasqan bul termınal elimizge qaraı júkterdiń turaqty tasymaldanýyn qamtamasyz etedi jáne otandyq eksporttaýshylar úshin jańa ótkizý naryqtaryna jol ashady.

Álemdik Huawei, Wabtec jáne PSA sekildi jetekshi kompanııalarmen birge «Aqyldy temirjol» jobasyn júzege asyrý jumystary júrgizilip jatyr. Jańa sheshimderdiń engizilýi temirjoldyń ótkizý qabiletin ulǵaıtýǵa, otyn shyǵynyn azaıtýǵa jáne poıyzdardyń qaýipsizdigin arttyrýǵa múmkindik beredi.

Kezdesý sońynda Qasym-Jomart Toqaev kompanııanyń ınvestıtsııalyq jobalaryn iske asyrý mańyzdy ekenin atap ótip, elimizdiń kólik-tranzıt áleýetin damytý máselesine basa nazar aýdardy.