Prezıdent Qazaqstan tarıhyna arnalǵan jańa jeti tomdyq qashan daıyn bolatynyn aıtty

QYZYLORDA. KAZINFORM – Qazaqstannyń akademııalyq tarıhy boıynsha kólemdi jeti tomdyq shyǵarylady. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

Prezıdent jalpy túrki órkenıetin zertteýge kóp kóńil bólinip jatqanyn, osy oraıda qyrkúıek aıynda reseılik áriptestermen jáne basqa elderdiń ókilderimen birge «Altaı – túrkilerdiń ataqonysy» taqyrybynda halyqaralyq konferentsııa ótkizý josparlanyp otyrǵanyn málim etti.

Sonymen qatar Memleket basshysy bes jyl buryn «Táýelsizdik bárinen qymbat» atty maqalasynda zamanaýı ǵylymı tásilderdi qoldana otyryp, elimizdiń jańa akademııalyq tarıhyn daıarlaý mindetin qoıǵanyn aıtty. 

- Jyl sońyna qaraı bul aýqymdy jáne irgeli zertteý jumysy aıaqtalyp, Qazaqstannyń akademııalyq tarıhy boıynsha kólemdi jeti tomdyq shyǵarylatyn bolady, - dedi Prezıdent. 

Osy oraıda Qasym-Jomart Toqaev bul eńbek memlekettiligimizdi nyǵaıtýda mańyzdy úles qosatynyn aıtty.

Buǵan deıin Qazaqstan tarıhynyń jańa jeti tomdyǵyn daıarlaý aıasynda ǵylymı qyzý pikirtalas júrip jatqanyn jazǵan edik.