Memleket basshysy jańa Bıýdjet kodeksine qol qoıdy
ASTANA. KAZINFORM — Qazaqstan Respýblıkasynyń Bıýdjet kodeksiniń mátini baspasózde jarııalanady, dep habarlaıdy Aqordanyń baspasóz qyzmeti.
➤ Kodekstiń birinshi blogy memlekettik qarjy týraly erejelerge saı salyq-bıýdjet, aqsha-nesıe jáne fıskaldy saıasatty baılanystyrýǵa baǵyttalǵan.
➤ Ekinshi blok memlekettik organdardyń derbestigi men jaýapkershiligin arttyra otyryp, bıýdjet protsesin ońtaılandyrdy. Bıýdjet protsesteriniń merzimderi men kezeńderi qysqartyldy. Bıýdjettik baǵdarlamalar ákimshileriniń ókilettikteri men jaýapkershiligin edáýir keńeıtý esebinen bloktyq bıýdjet elementteri engizildi. Memlekettik organdarǵa bıýdjettik baǵdarlama shyǵystarynyń 15 paıyzy kólemindegi qarajatty derbes basqarý quqyǵy berildi. Memlekettik organdar bıyl jumsalmaǵan bıýdjet qarjysyn kelesi jyldyń qańtar aıynan bastap paıdalana alady. Bul shyǵystardy úzdiksiz qarjylandyrýǵa múmkindik beredi.
➤ Úshinshi blok parlamenttik baqylaýdy kúsheıtýge arnalǵan. Memlekettik kepildikterdi, memleket kepilgerlikterin berý lımıtin, úkimettik borysh lımıtin jáne jergilikti atqarýshy organdar boryshyn, kvazımemlekettik sektor sýbektileriniń syrtqy qaryz lımıtin Parlament qarastyryp, bıýdjet týraly zańmen bekitedi.
➤ Tórtinshi blok bıýdjettiń kiris bóligin josparlaý sapasyn arttyrý jáne bıýdjet qarjysyn tıimdi paıdalaný jóninde pármendi sharalar qabyldaýdy kózdeıdi. Kodekste kvazımemlekettik sektor sýbektilerine qatysty memlekettik dıvıdend saıasatynyń negizgi erejeleri belgilengen.
➤ Besinshi blok jınaq fýnktsııasyna basa nazar aýdara otyryp, Ulttyq qordy paıdalaný sharttaryn belgileıdi. Ulttyq qordy paıdalaný Prezıdent bekitken maqsatty baǵdarlarmen shekteledi. Qordyń qarajatyn ishki qarjy quraldaryna salýǵa ruqsat etilmeıdi. Bul aqshany bıýdjetten tys paıdalanýǵa jol bermeıdi. Ulttyq qordyń nysanaly transferti tek jalpyhalyqtyq mańyzy bar nysandar men jobalardy qarjylandyrýǵa ǵana paıdalanylady. Ol úshin tıisti krıterııler engizildi.
➤ Altynshy blok kvazımemlekettik sektor sýbektileriniń boryshyn qosa alǵanda, memlekettiń qaryz saıasatyna baqylaýdy keńeıtýge baǵyttaldy. Ýákiletti organdar memlekettik sektordyń boryshtyq mindettemelerine boljaý, monıtorıng jáne baǵalaý júrgizý sharalaryn júzege asyrady. Kvazımemlekettik sektordyń syrtqy borysh lımıti respýblıkalyq bıýdjet týraly zańmen belgilenedi.
➤ Túzetýlerdiń jetinshi blogy bıýdjetaralyq qatynastardy jetildire tústi. Azamattardy bıýdjet qarajatyn bólý protsesine belsendi tartý úshin halyq qatysatyn bıýdjet tártibi zańnamalyq negizde bekitilgen.
Buǵan deıin Memleket basshysy Qasym-Jomart Toqaevtyń Ulttyq quryltaıdyń IV otyrysynda sóılegen sózi jarııalandy.