Prezıdent: Qazaqstan-Reseı shekarasyn Dostyq beldeýi dep ataýǵa tolyq quqyqtyq negiz bar

ASTANA. KAZINFORM — Prezıdent Qasym-Jomart Toqaev Reseıdiń «Rossııskaıa gazeta» basylymyna shyqqan «Máńgilik dostyq — halyqtarymyzǵa jol silter temirqazyq» atty avtorlyq maqalasynda eki eldiń shekarasy týraly sharttyń bekitilgenine 20 jyl tolǵanyn eske saldy. 

— Aty ańyzǵa aınalǵan Baıqońyr ǵarysh aılaǵynyń 70 jyldyq mereıtoıy eki eldi biriktiretin taǵy bir mańyzdy kezeń boldy. Bul keshen ǵaryshkerliktiń álemdik besigi jáne sana ulylyǵynyń sımvoly bolyp sanalady, — dedi Prezıdent.

Baıqońyr ondaǵan jyl boıy ǵylymı-tehnıkalyq progress pen bolashaqqa umtylysty beıneleıtin ózara strategııalyq áriptestiktiń berik býyny bolyp otyr.

— Biz 2005 jyldyń18 qańtaryndaǵy Qazaqstan-Reseı memlekettik shekarasy týraly sharttyń bekitilgenine 20 jyl tolǵanyna úlken mán beremiz. Qujat — eki eldiń egemendigi men aýmaqtyq tutastyǵyn ózara moıyndaýdyń myzǵymas quqyqtyq negizi. Álemdegi eń uzyn úziksiz qurlyq shekarasyn Dostyq beldeýi dep ataýǵa tolyq quqyqtyq negiz bar.

Qazaqstan men Reseıdiń óńiraralyq yntymaqtastyq forýmyn jyl saıyn ótkizýi tegis baılanystardyń búkil keshenin damytýǵa eleýli úles qosatyny sózsiz. Bul format jıyrma jyldan astam ýaqyt ishinde ekijaqty qatynastardy nyǵaıtýdyń tıimdi alańy retinde qalyptasty, — dedi Qasym-Jomart Toqaev.

Aıta ketý kerek, bıylǵy forým Oral qalasynda ótedi.