Prezıdent Qazaqstan polıtsııasyn reformalaý qalaı júrgiziletinin aıtyp berdi
«Biz halyq arasynda saýalnama júrgizgen edik. Men sol kezde kópshiliktiń quqyq qorǵaý organdaryna degen narazylyǵy baryn bildim. Ásirese, bizdiń sportshymyz Denıs Tenmen bolǵan oqıǵa... Kúndelikti qylmystyń tizbegin oqyp otyrsam, jol-kólik oqıǵasy saldarynan kúnine 10-15 adam qaıtys bolyp jatady. Kisi ólimi boıynsha da kúnine 4-5 jaǵdaı tirkeledi. Biraq, bul jaǵdaı (Denıs Tenniń ólimi) rezonans týdyrdy. Qazir bul qylmysty jasaǵandardyń isi boıynsha sot otyrystary ótip jatyr. Bul jaǵdaıǵa ǵana emes, jalpy polıtsııa jumysyna degen narazylyq bar», - dedi Nursultan Nazarbaev otandyq BAQ ókilderimen kezdesý barysynda.
Prezıdent sol sebepti osy máselege jiti nazar aýdaryp, polıtsııamen óte tyńǵylyqty jumys júrgizý kerektigin atap ótti.
«Birinshiden, polıtsııanyń jańa kelbetin jasaýymyz kerek. Ol úshin qazirgi tańda sheneýnikterdi azaıtý kerek dep sheshtik. 12 oqý ornynyń beseýi ǵana qalady. Qazir olarda úsh adamǵa bir komandırden keledi. Endi joq degende beseýine bir komandır qylmaqpyz. Bunyń bárinen únemdelgen qarajatqa polıtseılerdiń aılyq jalaqysyn arttyramyz. Ekinshiden, Batysta polıtsııa akademııasynda jarty jyl ǵana oqıdy. Bizde bolsa, bes jyl boıy oqıdy da, bul uzaq oqýdan eshqandaı paıda bolmaıdy. Sondyqtan, bes oqý ornynda osyndaı akademııa quramyz. Bes-alty aı jas órendi oqytyp, shen berip, álgi qyzmetker jumysqa attanady. Meniń oıymsha, JOO-lardaǵy zańgerlik fakýltetterdi bitiretin kóp jigitterdi sol jaqqa qaraı tartýǵa bolady» - dedi Elbasy.
Nursultan Nazarbaevtyń aıtýynsha, barlyq polıtsııa ýchaskelerinde front-keńseler bolýy kerek. Ol jerge qarapaıym azamat kelip, kez kelgen suraqtaryna jaýap ala alýy tıis.
«ıAǵnı, azamattardyń polıtsııaǵa degen senimi bolýy kerek. Qazaqstandyq polıtsııa qyzmetkerleri - birimizdiń týysymyz, birimizdiń balamyz nemese baýyrymyz. Bizdiń olardyń jumysyna qoldaý bildirgenimiz abzal. Osy jyldardyń ishinde men atap ótkenimdeı, 779 polıtseı qaıtys bolǵan. Demek, olar eki qolyn tóbesine qoıyp, bos otyrǵan joq. Olardyń arasynda óte adaly da bar. Ony da eskerý kerek. Sol sebepti, polıtsııa beınesin múlde basqasha etý úshin bárin de túbegeıli ózgertetin bolamyz. Olarǵa ıaǵnı, jaqsy kirispen birge jaýapkershilik te arttyrý kerek. Tıisti áleýmettik paketpen de qamtamasyz etilýi tıis. Eger ol óz mindettemesin laıyqty atqara almaıtyn bolsa, ol osy artyqshylyqtardyń bárinen, zeınetaqysyna deıin aıyrylatyn bolady. Sot júıesinde de solaı. Sottardy irikteýde de baǵyt, sottarǵa degen talap ózgerýde. Azamattar kez kelgen máselesimen sotqa baryp, suraqtaryn sheshe alýy kerek», - dedi Nursultan Nazarbaev.
