Prezıdent: Qazaqstan – naǵyz daryndy jastardyń eli
ASTANA. KAZINFORM – Bul týraly Memleket basshysy halyqaralyq pán olımpıadalary jeńimpazdarymen jáne júldegerlerimen kezdesken kezde aıtty.
Prezıdent Qazaqstan – naǵyz daryndy jastardyń eli. Ul-qyzdarymyz barlyq baǵytta, ásirese, bilim salasynda úzdikter qatarynan kórinip keletinin aıtty.
– Bıyl oqýshylarymyz 44 halyqaralyq olımpıada men ǵylymı saıysqa qatysyp, myńnan astam medal jeńip aldy. Onyń 200-den astamy – altyn medal. Muny tamasha jetistik deýge bolady. Osy tusta halyqaralyq fızıka olımpıadasynda keremet óner kórsetken oqýshylardy erekshe atap ótkim keledi. Bedeldi básekege qatysqan bes talapkerimizdiń beseýi de altyn medal alyp, jeńimpaz atandy. Bul – buryn-sońdy bolmaǵan biregeı kórsetkish. Jalpy, biz barlyq baǵyttar boıynsha osyndaı úzdik nátıjege umtylýymyz kerek. Qazaqstan jastarynyń áleýeti oǵan tolyq jetedi, – dedi Qasym-Jomart Toqaev.
Prezıdent qazir elimiz tarıhı órleý kezeńine qadam basqanyna nazar aýdardy.
– Biz bir el, bir halyq bolyp aýqymdy reformalardy júzege asyrdyq. Jańa Konstıtýtsııamyzdy qabyldadyq. Elimizdiń bas qujatynda ǵylym men bilimge, ınnovatsııaǵa basymdyq berdik. Eń bastysy, jańa Konstıtýtsııa óskeleń urpaqtyń ıgiligi úshin jazyldy. Keshe ǵana tarıhymyzda tuńǵysh ret Quryltaı saılaýy ótti. Bul saılaý sátti, minsiz uıymdastyryldy dep aıtsaq, qate bolmas. Osy múmkindikti paıdalanyp, búkil halqymyzǵa azamattyq kemeldik tanytyp, jańarý strategııamyzdy qoldaǵany úshin myń da bir alǵysymdy aıtamyn. Saılaý kezinde bir top baıqaýshylar, sonyń ishinde halyqaralyq baıqaýshylar óte tıimdi jumys istedi. Olarǵa da zor rızashylyǵymdy bildiremin. Sondaı-aq Ortalyq saılaý komıssııasynyń múshelerine rahmetimdi aıtamyn. Olar óte tabandy qyzmet atqardy, – dedi Qasym-Jomart Toqaev.
Aıta ketelik Prezıdent halyqaralyq pán olımpıadalary jeńimpazdarymen jáne júldegerlerimen kezdesken edi.
