Prezıdent Qazaqstan men Reseı birlesip atap ótetin ataýly datalardy aıtty
ASTANA. KAZINFORM – Qazaqstan men Reseı kelesi jyly birqatar ataýly kúnge oraı merekelik is-sharalar ótkizedi. Bul týraly Aqordada Reseı prezıdenti Vladımır Pýtınmen kelissózderdiń qorytyndysyna oraı ótken brıfıngte Memleket basshysy Qasym-Jomart Toqaev aıtty.
«2025 jylǵa kóp sharýa bar. Óte kóp birlesken jobany júzege asyrýymyz qajet. Ol elimizdiń azamattaryna da, bızneske de aıtarlyqtaı paıda ákelerine senimdimin. Kelesi jyldyń qańtar aıynda negizgi memleketaralyq qujattardyń birine — Qazaq-Reseı memlekettik shekarasy týraly shartqa 20 jyl tolady. 2025 jyly bizdi úlken mereıtoılar, Uly Jeńistiń 80 jyldyǵy jáne Baıqońyr ǵarysh aılaǵynyń 70 jyldyǵy kútip tur. Biz elderimizde osy ataýly kúnderdiń barlyǵyna oraı merekelik is-sharalar ótkizýge kelistik», — dedi Memleket basshysy.
Qasym-Jomart Toqaev ekijaqty kúntártibi únemi naqty bastamalarmen jáne jańa qyzyqty jobalarmen tolyqtyrylyp otyratyndyǵyn aıtty.
«Sózimdi qorytyndylaı kele, Qazaqstan men Reseı halyqtarymyzdyń, ásirese óskeleń urpaqtyń ilgerileýi men ál-aýqatynyń negizin qalaı otyryp, strategııalyq áriptestikti nyǵaıtý jolymen árdaıym júrip kele jatqanyn taǵy da atap ótkim keledi. Búgingi is-sharalardyń oń nátıjeleri bizdiń odaqtastyq qatynastarymyzdy sapaly jańa deńgeıge shyǵarýǵa múmkindik beretinine senimdimin», — dedi Prezıdent.