Prezıdent Qazaqstan men Reseı arasynda astyq óńdeýdiń birlesken klasterin qurýdy usyndy
ASTANA. KAZINFORM – Memleket basshysy ekinshi «Ortalyq Azııa – Reseı» sammıtinde aýyl sharýashylyǵyndaǵy birlesken jumystardyń múmkindigi kóp ekenin málimdedi. Bul týraly Aqordanyń baspasóz qyzmeti habarlady.
– Qazirdiń ózinde oń nátıje bar. Biraq ınnovatsııalardy birlesip engizýge ekpin bere otyryp, mol tabysqa jetýge bolady. Bul arada agrotehnologııalyq startaptar qurý, jer ıgerýdiń dál tehnologııasyn keńinen qoldaný, zamanaýı agrologıstıkalyq alańdardy damytý, quzyretter ortalyǵyn jasandy ıntellektini paıdalana otyryp qalyptastyrý jóninde sóz bolyp otyr. Reseı álemdegi iri astyq óndirýshi jáne tasymaldaýshy elderdiń qataryna kiredi. Bul baǵytta Qazaqstan da dúnıe júzindegi kóshbasshylardyń biri. Osy saladaǵy zor áleýetimizdi eskere otyryp, astyqty tereń óńdeýdiń birlesken klasterin qurý jobasyn qarastyrýdy usynamyz. Bul tek bıdaı men un ǵana emes, qosylǵan quny joǵary ónimder shyǵarýǵa múmkindik beredi. Biz syrtqy naryqta bir-birimizben básekege túspeı, agroónerkásip keshenin joǵary tehnologııalyq salaǵa aınaldyrýdyń strategııalyq paıymyn negizge alýǵa tıispiz. Jalpy, Ortalyq Azııa elderi áleýetiniń sınergııasy men Reseıdiń ekonomıkalyq múmkindikteri kópjosparly seriktestigimizdiń mazmunyn baıyta túsedi, – dedi Qasym-Jomart Toqaev.
Prezıdent kólik-logıstıka sektoryn nyǵaıtýdy taǵy bir mańyzdy baǵyt retinde atady.
– Elimiz úshin Reseımen strategııalyq yqpaldastyqtyń mańyzy zor. Geografııalyq turǵydan ońtaıly ornalasqan Qazaqstan eýrazııalyq kólik-logıstıka jelisiniń ózegi retinde Shyǵys pen Batysty, Soltústik pen Ońtústikti turaqty baılanystyra alady. Reseı – óńir memleketteriniń álem naryǵyna shyǵatyn negizgi qaqpasy. Sondyqtan Reseımen kólik-logıstıka salasyndaǵy yntymaqtastyqtyń strategııalyq sıpaty aıryqsha mańyzdy. Qazaqstan aýmaǵy arqyly 11 halyqaralyq kólik dálizi ótedi, ıaǵnı bes temir jol jáne alty avtokólik joly. Oǵan Azııa men Eýropa arasynda qurlyq arqyly tasymaldanatyn júktiń 85 paıyzy tıesili. Sońǵy 15 jylda salany keshendi jańǵyrtýǵa 35 mıllıard dollardan asa qarjy jumsaldy. Nátıjesinde júk tasymalynyń kólemi turaqty túrde ósip keledi. Reseıden Ortalyq Azııaǵa Qazaqstan arqyly temir jolmen tasymaldanǵan júk kólemi sońǵy úsh jylda 26 paıyz artyp, 30 mıllıon tonnadan asty. Bul rette keri baǵyttaǵy tranzıt shamamen 50 paıyz ulǵaıdy. Sonymen qatar Reseıden Qytaıǵa elimiz arqyly tasymaldanatyn júk kólemi 3 ese artyp, 5 mıllıon tonnaǵa jetti, – dedi Memleket basshysy.
Qasym-Jomart Toqaev ekinshi «Ortalyq Azııa – Reseı» sammıtinde sóılegen sózinde Qazaqstan men Reseı arasyndaǵy saýda kólemi týraly aıtty.