Prezıdent: Qazaqstan men Oman ınvestıtsııalyq múmkindikterin biriktiredi
ASTANA. KAZINFORM — Oman Sultany Haısam ben Tarıq Ál Saıdtyń elimizge memlekettik sapary aıasynda qazaq-oman bıznes forýmy ótti. Jıynǵa eki eldiń jetekshi kompanııalary men iskerlik top ókilderi qatysty. Bul týraly Aqorda málim etti.
Qasym-Jomart Toqaev forýmda sóılegen sózinde ózara senim men túsinistik sıpatynda ótken joǵary deńgeıdegi kelissózderdiń ashyq, obektıvti ári shyn máninde mazmundy bolǵanyn aıtty.
Memleket basshysy Qazaqstan men Oman arasyndaǵy saýda-ekonomıkalyq jáne ınvestıtsııalyq baılanystardy ilgeriletý úshin tıisti kelisimshart-quqyq bazasy men ınstıtýttyq negizderdi kúsheıtý qajet ekenin alǵa tartty.
Prezıdent bul rette Investıtsııalardy kótermeleý týraly kelisimniń mańyzyna toqtaldy. Atalǵan ýaǵdalastyq aıasynda jobalardy iske asyratyn ınvestorlar anaǵurlym túsinikti, ashyq ári senimdi sharttarmen qamtamasyz etilgen.
Sondaı-aq eki eldiń iskerlik toptary arasyndaǵy tikeleı baılanystardy damytýǵa aıryqsha mán berildi.
— Qazaqstan-Oman iskerlik keńesi bıznes ókilderi bir-birimen belsendi aralasatyn alań bolatynyna senimdimin, — dedi Prezıdent.
Memleket basshysynyń paıymdaýynsha, tıimdi qarjylyq tetikter Qazaqstan men Omannyń ortaq maqsattaryn qýattaı túsedi.
— Biz «Samuryq-Qazyna» AQ men Oman ınvestıtsııalyq basqarmasy arasyndaǵy birlesken ınvestıtsııalyq qurylymdy iske qosý týraly kelisimge qol qoıylýyn quptaımyz. Bul mańyzdy bastama qarjylyq múmkindikterdi biriktirip, qosymsha ınvestıtsııa tartýǵa múmkindik beredi. Sondaı-aq biz Omannyń jaqynda qurylǵan Halyqaralyq qarjy ortalyǵymen yntymaqtastyqty jolǵa qoıýǵa bolady dep sanaımyz. Eki el qarjy ınstıtýttarynyń bir-birimen tikeleı baılanys ornatýy ınvestıtsııalyq múmkindikterge jol ashady, — dedi Prezıdent.
Aıta keteıik, búgin elordada Prezıdent Qasym-Jomart Toqaevtyń Qazaqstanǵa memlekettik saparmen kelgen Oman Sultany Haısam ben Tarıq Ál Saıdty qarsy alý rásimi ótti.
Keıin Prezıdent Qasym-Jomart Toqaev pen Oman Sultany Haısam ben Tarıq Ál Saıd shaǵyn quramda kelissóz júrgizdi.
Toqaev pen Oman Sultany AHQO-nyń ınvestıtsııalyq múmkindikterimen tanysty.
