Prezıdent: Qazaqstan men Qytaıdyń negizgi halyqaralyq máselelerdegi ustanymy birdeı nemese uqsas

SIANЬ. QazAqparat – Qazaqstan men Qytaıdyń negizgi halyqaralyq máselelerdegi ustanymy birdeı nemese uqsas. Bul týraly Prezıdent Qasym-Jomart Toqaev memlekettik sapary barysynda Sı Tszınpınmen júrgizilgen kelissóz kezinde aıtty, dep habarlaıdy QazAqparat Aqordaǵa silteme jasap.

«Qazaqstan men Qytaıdyń negizgi halyqaralyq máseleler boıynsha ustanymdary birdeı nemese uqsas. Sondaı-aq, eki tarap bir-biriniń halyqaralyq bastamalaryn dáıekti túrde qoldaıdy.

Osy rette Sizdiń jahandyq qaýipsizdik, jahandyq damý jáne jahandyq órkenıet salasyndaǵy halyqaralyq baǵdarlamalyq bastamalaryńyzdy qoldaıtynymdy aıtqym keledi.

Bul bastamalardyń júzege asyrylýy álemdegi turaqtylyqqa, qaýipsizdik pen senimge qol jetkizýge yqpal etetinine, sondaı-aq ornyqty damý maqsattaryna qol jetkizýdi jedeldetetinine senimdimin», - dedi Prezıdent.

Qasym-Jomart Toqaev QHR Tóraǵasy Sı Tszınpınniń ózara qarym-qatynasty damytýǵa qosqan ólsheýsiz úlesin joǵary baǵalaıtynyn jetkizdi. Sondaı-aq, eki eldiń yntymaqtastyǵyn jańa beleske kóterý úshin bar kúsh-jigerin jumyldyrýǵa daıyn ekenin atap ótip, búgingi kelissózder ekijaqty yqpaldastyqqa tyń serpin beretinine senim bildirdi.