Prezıdent: Qazaqstan memleketterdiń aýmaqtyq tutastyǵy qaǵıdatynyń buzylýyna qarsy
ASTANA. KAZINFORM — Qazaqstan men Qytaı halyqaralyq arenada da belsendi ári qarqyndy yqpaldastyq ornatyp otyr. Bul týraly Sınhýa agenttigine bergen jazbasha suhbatynda Qazaqstan Prezıdenti Qasym-Jomart Toqaev málim etti.
— Biz Birikken Ulttar Uıymynyń ortalyq rólin nyǵaıtý, halyqaralyq quqyq qaǵıdattaryn qorǵaý, medıatsııa men shynaıy kópjaqtylyqty ilgeriletý, sondaı-aq qaqtyǵystardy beıbit jolmen retteý máseleleri boıynsha uqsas ustanymdardy basshylyqqa alamyz, — dedi Qasym-Jomart Toqaev.
Prezıdent Qazaqstannyń «Birtutas Qytaı» saıasatyn qoldaıtynyn jáne memleketterdiń aýmaqtyq tutastyǵy qaǵıdatynyń buzylýyna qarsy ekenin atap ótti. Qazaqstan BUU, ShYU jáne AÓSShK aıasynda Qytaımen ózara úılesimdi jumysty jalǵastyrady. Sondaı-aq «Ortalyq Azııa — Qytaı» formatyndaǵy yntymaqtastyqty tolyq qoldaıdy.
Sonymen qatar Memleket basshysy bıyl Shanhaı yntymaqtastyq uıymynyń qurylǵanyna 25 jyl tolǵanyna nazar aýdardy. Qasym-Jomart Toqaevtyń paıymdaýynsha, Uıym eń basty qundylyǵy — ózara senimge, teń quqyq pen dıalogqa, mádenı áralýandyqty qurmetteýge jáne birlesken damýǵa umtylatyn «Shanhaı rýhyn» saqtap qaldy. Qazaqstan Prezıdenti bul qaǵıdattardy halyqaralyq yntymaqtastyqtyń ózindik «standarty» retinde baǵalaıtynyn aıtty.
Qazaqstan Prezıdenti kelesi jyly Qazaqstan men Qytaı arasynda dıplomatııalyq qatynastardyń ornaǵanyna 35 jyl tolatynyna toqtaldy. Bul rette saıası jáne ekonomıkalyq baılanystarmen qatar, eki el azamattary arasyndaǵy tikeleı qarym-qatynastar da belsendi damyp keledi. 2026 jyly Qazaqstan men Qytaıdyń «Mádenıet jylyn» ótkizýi osy úrdistiń jarqyn dáleli boldy.
Ózara vızasyz rejımniń engizilýi týrızm salasynyń damýyna aıtarlyqtaı serpin berdi. Qasym-Jomart Toqaevtyń aıtýynsha, 2025 jyly Qazaqstanǵa kelgen qytaılyq týrıster sany 962 myń adamǵa jetti. Bul 2024 jylǵy kórsetkishpen salystyrǵanda 47 paıyzǵa kóp.
— Qytaılyq dostarymyzǵa Qazaqstanda etene tanysatyn dúnıe jetkilikti. Zamanaýı elordamyz ben kóne Túrkistandy, Almatynyń asqarlary men Mańǵystaýdyń biregeı bederin, Uly dala men Uly Jibek jolynyń murasyn, mýzykamyzdy, ulttyq dám men aspaptarymyzdy, qonaqjaı qalpymyzdy kórsetkimiz keledi. Sonymen qatar Qazaqstan da ejelgi órkenıet eli ári búginde damý jolynda tańǵalarlyq úlgi kórsetip otyrǵan Qytaıdy zor qyzyǵýshylyqpen tanyp-bilip keledi, — dedi Memleket basshysy.
