Prezıdent Qazaqstan qutqarýshylaryn kásibı merekemen quttyqtady
Memleket basshysy Qasym-Jomart Toqaev Azamattyq qorǵanys salasynyń qyzmetkerlerin Qutqarýshy kúnimen quttyqtady, dep habarlaıdy Kazinform.
«Azamattyq qorǵanys salasynyń qyzmetkerlerin Qutqarýshy kúnimen quttyqtaımyn! Sizderdiń jumystaryńyz qaýip-qaterge toly ári zor jaýapkershilikti talap etedi. Memleket pen qoǵam sizderdiń antqa adaldyqtaryńyzdy, qajyrly eńbekterińizdi joǵary baǵalaıdy. Barshańyzǵa baq-bereke tileımin!», – dep jazdy Qasym-Jomart Toqaev H paraqshasyna.
Sondaı-aq el qutqarýshylaryn Tótenshe jaǵdaılar mınıstri Syrym Sháriphanov quttyqtady.
«Sońǵy ýaqytta tek bizdiń elimizde ǵana emes, kórshi memleketterde de bolyp jaqan tótenshe jaǵdaılar, bizdiń júıe úshin úlken synaq boldy.
Bizdiń qutqarýshylarymyz gýmanıtarlyq mıssııa atqarý aıasynda Túrkııa men Aýǵanstanda avarııalyq-qutqarý jumystaryn júrgizgenin erekshe atap ótkim keledi. Kásibı biliktilik deńgeıi, jyldar boıy jınaǵan tájirıbesi, eń kúrdeli mindetterdi pysyqtaý jyldamdyǵy men shapshańdyǵy jaǵynan bizdiń qutqarýshylarymyz úzdikterdiń qatarynda boldy.
Sondyqtan bizdiń azamattarymyz TJM qyzmetkerleriniń kez-kelgen ýaqytta kúni-túni kómekke kelýge daıyn ekenin, árbir adamdy qutqarý úshin zilzalamen kúresip, tipti óz ómirin qııatynyn biledi», - dedi ol.
Aıta keteıik, Qutqarýshylar kúni Qazaqstanda jyl saıyn 19 qazanda atalyp ótedi. Kásibı merekeniń bekitilýi elimizde Tótenshe jaǵdaılar jónindegi ortalyq memlekettik komıtettiń qurylýymen baılanysty.
