Prezıdent: Qazaqstan Irandy baýyrlas kórshi, Orta Shyǵystaǵy senimdi seriktes dep biledi
ASTANA. KAZINFORM — Qasym-Jomart Toqaev pen Masýd Pezeshkıan shaǵyn quramda kelissóz júrgizdi. Bul týraly Aqordanyń baspasóz qyzmeti habarlady.
Qasym-Jomart Toqaev qazaq eli árdaıym Irandy qoldaıdy, aramyzda eshqandaı túıtkil, ıá bolmasa, sheshilmegen másele joq ekenin aıtty.
— Asa qurmetti Prezıdent myrza, Qazaqstanǵa qosh keldińiz! Elimizge alǵash ret resmı saparmen kelip otyrsyz. Qazaqta «Kórshi tatý bolsa — qut» degen jaqsy sóz bar. Eki eldi qart Kaspıı baılanystyrady. Qazaqstan Irandy jaqyn ári baýyrlas kórshi, Orta Shyǵystaǵy senimdi seriktes dep biledi. Biz qashanda Iranǵa tileýlespiz. Qıyndyqtarǵa qaramastan qarym-qatynasty úzgen joqpyz. Qazaq-ıran baılanysynyń tamyry tereńde jatyr. Qos halyqtyń tarıhy — ortaq, salt-dástúri men mádenıeti — uqsas. Yqpaldastyǵymyz ǵasyrlar boıy jalǵasyp kele jatyr. Qazaq eli árdaıym Irandy qoldaıdy, aramyzda eshqandaı túıtkil, ıá bolmasa, sheshilmegen másele joq. Sondyqtan eki el arasyndaǵy qarym-qatynastyń keleshegi zor. Qazaqstan men Iran arasynda syndarly saıası dıalog qalyptasqan, úkimetterimiz birlesip jumys isteıdi. Ózara ýaǵdalastyqtarymyz oryndalýda, parlamentaralyq baılanys ta nyǵaıyp keledi. Saýda-ekonomıka salasyndaǵy alys-beris jyldan jylǵa kúsheıip keledi. Bıylǵy 10 aıda kórsetkishter byltyrǵymen salystyrǵanda 40 paıyzǵa artty. Bul — árıne, óte jaqsy jetistik. Biraq osy qarqyndy toqtatpaı, ózara saýda kólemin ulǵaıta túsý qajet, — dedi Prezıdent.
Óz kezeginde Masýd Pezeshkıan eki eldiń saıası-ekonomıkalyq, mádenı-gýmanıtarlyq jáne qaýipsizdik salalaryndaǵy yqpaldastyqtyń áleýeti zor ekenin atap ótti.
— Tarıhy tereń, mádenıeti baı baýyrlas, dostas Qazaqstanǵa kelgenime qýanyshtymyn. Kóptegen baǵytta yntymaqtastyǵymyz qarqyndy túrde damyp keledi. Úkimetterimiz nátıjeli jumys atqarýda. Saıası-ekonomıkalyq, mádenı-gýmanıtarlyq jáne qaýipsizdik salalaryndaǵy yqpaldastyqtyń áleýeti zor dep oılaımyn, — dedi Iran Prezıdenti.
Budan buryn Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy alǵanyn jazǵanbyz.