Prezıdent Qazaqstan ınvestorlar qaýymdastyǵynyń tóraǵasy Bolat Aqsholaqovty qabyldady

ASTANA. KAZINFORM — Prezıdentke Investorlar qaýymdastyǵy qyzmetiniń basym baǵyttary men negizgi bastamalary tanystyryldy. Bul uıym Memleket basshysynyń aqpan aıyndaǵy iri bıznes ókilderimen kezdesýde bergen tapsyrmasyna saı qurylǵan bolatyn.

Kezdesýde: 

qaýymdastyqtyń memleket pen ınvestorlar arasyndaǵy dánekerlik rólin kórsetetin aýqymdy kún tártibi talqylandy; 

eń aldymen sheshilýge tıis mindetter retinde ekonomıkany yryqtandyrýǵa, memlekettiń bızneske aralasýyn azaıtýǵa, memlekettik basqarý júıesine tsıfrlyq sheshimder men jasandy ıntellekt tehnologııalaryn engizýge basa mán berildi;

salyq júıesin jańǵyrtý, monopolııaǵa qarsy saıasatty jetildirý, jekeshelendirýdiń tıimdiligin arttyrý jáne memlekettik satyp alýdy reformalaý máseleleri qozǵaldy.

Bolat Aqsholaqov Memleket basshysyna otandyq bıznestiń ulttyq reıtıngin iske qosý jónindegi usynysyn jetkizdi.

Qasym-Jomart Toqaev bul bastamalardy qoldap, ınvestıtsııalyq klımatty jaqsartý jáne ornyqty ekonomıkalyq ósimdi qamtamasyz etý turǵysynan olardy júzege asyrý mańyzdy ekenin atap ótti.

Aıta keteıik, buǵan deıin Memleket basshysy Kásipkerlerdiń quqyǵyn qorǵaý jónindegi ýákil Qanat Nurovty qabyldady.