Lázzat Shyńǵysbaeva Prezıdentke «Qazaqstan halqyna» qorynyń jumysy týraly baıandady
ASTANA. KAZINFORM - Qasym-Jomart Toqaevqa «Qazaqstan halqyna» qory qyzmetiniń nátıjeleri jáne iske asyryp jatqan qaıyrymdylyq bastamalary týraly málimet berildi, - dep habarlaıdy Aqordanyń baspasóz qyzmeti.
Lázzat Shyńǵysbaevanyń aıtýynsha, qordyń qamqorshylyq keńesi áleýmettik mańyzy zor mindetterdi sheshýge baǵyttalǵan 134 qaıyrymdylyq baǵdarlama men jobany bekitken.
Memleket basshysyna qordyń bilim berý, densaýlyq saqtaý, sport jáne mádenıet salalarynda aýqymdy sharalar atqaryp jatqany jóninde baıandaldy.
Atap aıtqanda, onkologııalyq qyzmetke qoldaý kórsetilip, medıtsınalyq uıymdar zamanaýı qurylǵylarmen, sonyń ishinde sáýlelik terapııaǵa arnalǵan qondyrǵylarmen jabdyqtaldy. Sondaı-aq óńirlerde ońaltý ınfraqurylymy jańǵyrtylyp, mamandandyrylǵan kómek kórsetý jolǵa qoıyldy.
Bilim berý bastamalaryna erekshe nazar aýdarylyp otyr. Granttar taǵaıyndalyp, aýyldyq jáne shaǵyn jınaqty mektepterdi damytý jobalary júzege asyrylyp jatyr. STEM-bilim berý men tsıfrlyq sheshimder sekildi zamanaýı oqý baǵdarlamalary engizilýde. Balalar men jastardyń qosymsha jáne ozyq bilimmen qamtylýyna, jasandy ıntellekt salasyn ıgerýine basa mán berilgen. Osy oraıda aımaqtarda bilimniń qoljetimdi bolýyna den qoıylǵan. Budan bólek, sport ınfraqurylymyn jetildirý, ınklıýzıvti sport ortalyqtaryn qurý jobalary qolǵa alynǵan.
Memleket basshysy qaıyrymdylyq sharalaryn ashyq, júıeli ári maqsatty túrde iske asyrýdyń mańyzyna toqtalyp, bul bastamalar halyqtyń turmys sapasyn arttyrýǵa jáne áleýmettik ál-aýqatyn jaqsartýǵa úles qosyp otyrǵanyn joǵary baǵalady.
Memleket basshysy osyǵan deıin Jetisý oblysynyń ákimi Beıbit Isabaevty qabyldaǵan bolatyn.
