Prezıdent Qazaqstan halqyna kezekti Joldaýyn jarııalap jatyr

ASTANA. KAZINFORM – Prezıdent Qasym-Jomart Toqaev Parlament palatalarynyń birlesken otyrysynda Qazaqstan halqyna «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn jarııalap jatyr.

Bul jolǵy Joldaý Parlament palatalarynyń jańa birlesken zalynda ótip jatyr.

Jıynǵa Senat pen Májilis depýtattary, ortalyq memlekettik organdardyń basshylary, Ulttyq quryltaı, Adam quqyqtary jónindegi komıssııa, Áıelder isteri jáne otbasylyq-demografııalyq saıasat jónindegi ulttyq komıssııa músheleri, qoǵam ókilderi jáne eńbek ujymdary qatysady.

Buǵan deıin Memleket basshysynyń Joldaýynda elimizdiń saıası jáne áleýmettik-ekonomıkalyq damý keleshegimen baılanysty máseleler qamtylatyny aıtylǵan bolatyn.

Respýblıkalyq telearnalar Joldaýdy tikeleı efırde kórsetip jatyr.

Eske salaıyq, Prezıdent byltyrǵy Joldaýyn «Ádiletti Qazaqstannyń ekonomıkalyq baǵdary» degen taqyryppen jarııalaǵan bolatyn. Sol qujatty iske asyrý aıasynda birneshe mınıstrliktiń quramy qaıta jasaqtalyp, Sý jáne ırrıgatsııa, Ónerkásip jáne qurylys, Kólik, Ekologııa jáne tabıǵı resýrstary mınıstrlikteri quryldy. Atalmysh Sý resýrstary jáne ırrıgatsııa mınıstrligi janynan Ulttyq gıdrogeologııa qyzmeti jasaqtaldy.

Joldaý aıasynda Úkimet Orta dálizdi damytý jónindegi Jol kartasyn iske asyryp jatyr. Bul dáliz arqyly keleshekte jylyna 10 mln tonnaǵa deıin júk tasymaldanady degen boljam bar.

Sondaı-aq, Úkimet bıyl óńdeý ónerkásibin damytý úshin zańnamany jetildirý, ákimshilik kedergilerdi azaıtý, jeńildetilgen qarjylandyrýdy bólý jáne otandyq óndiristi yntalandyrýdyń jańa quraldaryn engizý jóninde sharalar qabyldady.

Al «Bıznestiń jol kartasy» jáne «Qarapaıym zattar ekonomıkasy» baǵdarlamalary bir arnaǵa toǵystyrylyp, Shaǵyn jáne orta kásipkerlikti qoldaý men damytýǵa arnalǵan keshendi baǵdarlama qabyldandy.