Prezıdent Qazaqstan halqyn Naýryz meıramymen quttyqtady
ALMATY. KAZINFORM — Almaty qalasyna jumys saparymen barǵan Qasym-Jomart Toqaev «Astana» alańynda ótip jatqan merekelik is-sharada Qazaqstan halqyn Ulystyń uly kúnimen quttyqtady.
Memleket basshysy óz sózinde tól jańa jylymyz Naýryz meıramyn ata dástúrimizge sáıkes barsha jurtymyzdyń bir el, bir halyq bolyp qarsy alatyny jóninde aıtty.
— Babalarymyz ejelgi zamannan beri Ulys kúnin jyl basy retinde atap ótken. Qazir Áz Naýryz kúlli halyqqa ortaq jalpyulttyq merekege aınaldy. Ony ultyna, dinine qaramastan barsha jurtymyz erekshe kútedi, birge atap ótedi. Dana halqymyz «Jaqsy sóz — jarym yrys» dep beker aıtpaǵan. Jańa jyldy jaqsy nıetpen, paıdaly ispen bastaý — talaıdan qalyptasqan dástúr. Bul kúni qonaqjaı jurtymyz aq dastarqan jaıyp, bir-birine aqjarma tilekterin aıtady. Bulaqtyń kózin ashyp, tal egedi, tazalyqqa basa mán beredi. Naýryz merekesinde halqymyzdyń asyl qasıetteri men qundylyqtary túgel kórinis tapqan. Bıyl Ulystyń uly kúni Ramazan aıymen tuspa-tus kelip otyr. Qazaq jerindegi din men dástúrdiń úılesimi dál osy kezde aıqyn kórinedi, — dedi Qasym-Jomart Toqaev.
Prezıdent bıyldan bastap Naýryz meıramy 10 kún boıy atalyp ótip jatqanyna toqtaldy. Naýryznamaǵa sáıkes, búgin — elimizde Yntymaq kúni.
— Birlik pen yntymaq — elimizdiń basty qundylyqtarynyń biri. Biz janashyrlyq, tileýlestik sııaqty asyl qasıetterdi dáripteýimiz qajet. Elimizdiń birligi men tatýlyǵy árdaıym bekem bolsa, eldigimizdiń tuǵyry máńgi bolady. Men buǵan kámil senemin, — dedi Memleket basshysy.
Qasym-Jomart Toqaev jańarý men jańǵyrýdyń sımvolyna aınalǵan Naýryz meıramy bıyl qoǵam damýynyń jańa kezeńine qadam basqanymyzdy bildiretinin atap ótip, barlyq azamattyń júreginen oryn alatyn irgeli qundylyqtardyń aıqyndalǵanyna nazar aýdardy.
— Elimizdiń aldynda bıik maqsat tur. Bul — Ádiletti Qazaqstandy qurý. Biz adal eńbek etip, adal tabysqa jete alatyn ádil qoǵam ornatýymyz kerek. Mundaı qoǵamdy adal azamattar qalyptastyrady. Bir sózben aıtsaq, ádildik pen adaldyq — árdaıym qatar júretin egiz uǵym. Sondyqtan biz quryp jatqan qoǵamda barshaǵa birdeı múmkindik beriledi. Ádiletti memleket — bul zań men tártip ústemdigi. Ozyq memleket bolý úshin bárimiz tek jarqyn bolashaqqa senimmen qaraýymyz kerek. Bizdiń úmitimiz — jastar. Qazaqstannyń keleshegi sizderdiń qoldaryńyzda. Belsendi, sanasy sergek, oıy ushqyr, adal, kózi ashyq jastarǵa biz árdaıym qoldaý kórsetemiz, — dedi Prezıdent.
Memleket basshysy quttyqtaý sózinde egemendigimizdiń altyn besigi bolǵan Almatyny elimizdiń rýhanı, ǵylymı jáne ekonomıkalyq ortalyǵy dep atady.
— Almaty búkil Qazaqstannyń órkendeýine zor yqpal etedi. Sondyqtan men Almatynyń damýyn, qala turǵyndarynyń tynys-tirshiligin aıryqsha nazarda ustaımyn. Ásem Almatymyz bolashaqta budan da kórkeıe beretinine senemin, — dedi Qasym-Jomart Toqaev.
