Prezıdent: Qazaqstan ǵylymı zertteýlerge bólinetin qarjy kólemin ishki jalpy ónimniń 1 paıyzyna deıin arttyrady
ASTANA. KAZINFORM — Qasym-Jomart Toqaev birlesken ǵylymı zertteýlerdi taǵy bir mańyzdy baǵyt retinde atady. Bul týraly Aqordanyń baspasóz qyzmeti habarlady.
– Qazaqstan Horizon Europe baǵdarlamasyna qaýymdastyrylǵan múshe retinde qosylý úshin kelissóz bastady. Maqsatymyz – eýropalyq zertteý keńistigine kirigý. Elimiz Shıkizat materıaldary boıynsha eýropalyq seriktestiktiń tolyqqandy múshesi. Bul uıymnyń bıýdjeti 300 mıllıon eýrony quraıdy. TiBeRIUM jobasy osyndaı yntymaqtastyqtyń naqty mysaly sanalady. Bıyl Horizon Europe baǵdarlamasynyń 7,5 mıllıon eýro qarjylaı qoldaýymen jáne Fraıberg taý-ken akademııasynyń úılestirýimen iske qosylǵan joba Shyǵys Qazaqstan tehnıkalyq ýnıversıteti men Úlbi metallýrgııa zaýytyn bir iske jumyldyrdy. Joba tıtan men berılııge arnalǵan tómen kómirtekti óndiris tizbegin ázirleýdi maqsat etedi. Bizge dál osyndaı yntymaqtastyq aıasyn keńeıtý qajet. Sol arqyly ýnıversıtetter, ǵylym men óndiris bir arnaǵa toǵysyp, jetkizý tizbegi nyǵaıady. Nátıjesinde biz shıkizat resýrstarynan qosylǵan quny joǵary ónim men tehnologııaǵa kóshemiz, – dedi Memleket basshysy.
Prezıdenttiń aıtýynsha, tehnologııa transferi – seriktestiktiń úshinshi baǵyty. Qazaqstan ǵylymı zertteýlerge bólinetin qarjy kólemin ishki jalpy ónimniń 1 paıyzyna deıin arttyrady. Sonymen qatar kompanııalardy ýnıversıtet zertteýlerine ınvestıtsııa quıýǵa yntalandyrý tetikterin iske qosty.
Qasym-Jomart Toqaev nemis kásipkerlerin birlesken mekemeler janynan ınjenerlik zerthanalar men transfer ortalyqtaryn ashýǵa shaqyrdy. Sondaı-aq mundaı bastamalardy qosa qarjylandyrý arqyly qoldaýǵa daıyn ekenin jetkizdi.
Aıta ketelik Memleket basshysy Germanııanyń mańdaıaldy joǵary oqý oryndary rektorlarymen jáne ǵylymı ınstıtýt jetekshilerimen kezdesti.
