Prezıdent: Qazaqstan — Eýrazııadaǵy, ásirese Ortalyq Azııadaǵy turaqtylyq pen qaýipsizdiktiń tiregi
ASTANA. KAZINFORM — Memleket basshysy Qasym-Jomart Toqaev búgin qatarlyq Al Jazeera telearnasyna eksklıýzıv suhbat berdi.
Al Jazeera: Osy aptada Astana halyqaralyq forýmy ótip jatyr. Bul — Qazaqstandy álemge tanytatyn is-sharanyń biri. Sizdiń reformalar baǵdarlamasyn jarııa etkenińizge de 3 jyl boldy. Ózińiz ýáde etken jańa Qazaqstanǵa jete aldyńyzdar ma? Qalaı oılaısyz?
— Biz senimdi túrde alǵa qadam basyp kelemiz. Protsess júrip jatyr. Degenmen biz reformalardy qolǵa alǵanda Qazaqstanda ǵana emes, álemde kóptegen oqıǵa oryn aldy.
Al Jazeera: Atap aıtqanda, koronavırýs, Ýkraınadaǵy soǵys…
— Durys aıtasyz. Menińshe, bul ońaı dúnıe emes. Biz ádil ári naqty iske umtylýymyz kerek. Sonymen qatar ózgeristerdi júzege asyrǵanda barlyq jaǵynan batyl qımyldaý qajet. Sondyqtan kún tártibindegi turǵan maqsattyń bárine qol jetkizý úshin barynsha tabandy áreket etken durys. Iá, reforma jalǵasyp jatyr. Onyń nátıjesi de jetkilikti.
Al Jazeera: Sizdiń eldiń syrtqy saıasatyna nazar aýdaraıyqshy, Qazaqstan keıbir sheteldik seriktestermen qarym-qatynasyn oı eleginen ótkizip, keıbir saýda qatynasyn qaıta qarap jatyr ma? Máselen, qandaı da bir uly derjavaǵa táýeldi, tym jaqyn bolmaýy úshin Orta dáliz jobasyn jandandyrý degen sekildi…
— Birinshiden, biz syrtqy saıasatta qandaı da bir reforma júrgizip jatyrmyz deı almaımyn. Óıtkeni, bul — konservatıvti qubylys. Alaıda Qazaqstannan tysqary jerde oryn alyp jatqan jaǵdaılardy da qaperde ustaý qajet. Qazaqstan — Eýrazııadaǵy, ásirese Ortalyq Azııadaǵy turaqtylyq pen qaýipsizdiktiń tiregi. Biz áýel bastan iri derjavalarmen, sonyń ishinde kórshilerimizben teńgerimdi saıasat júrgizip kelemiz jáne ulttyq maqsattarymyzdy da umyt qaldyrǵan emespiz. Sondyqtan syrtqy saıasattaǵy ustanymymyz ózgerdi demes edim.
Orta dáliz týraly eske salǵanyńyz da oryndy. Sebebi biz kólik qatynastaryn ártaraptandyrýǵa basymdyq beremiz. Osy turǵydan alǵanda, Transkaspıı kólik baǵdarynyń mańyzy arta túsedi. Ózińiz biletindeı, biz «Bir beldeý, bir jol» bastamasyn qoldaımyz. QHR Tóraǵasy Sı Tszınpınniń 2013 jyly bul bastamany Qazaqstannyń elordasynda jarııa etýi de beker emes.
Eske salaıyq, 2024 jylǵy 3 qańtarda Memleket basshysy Qasym-Jomart Toqaev Egemen Qazaqstan gazetine kólemdi suhbat berip, ótken jyldardaǵy eldegi atqarylǵan jumysty qorytyndylap, aldaǵy strategııasyn bólisti.