Prezıdent: Qazaqstan birtindep damýdyń dańǵyl jolyna túsip keledi
ASTANA. KAZINFORM – Bul týraly Prezıdent Qasym-Jomart Toqaev Qazaqstan Respýblıkasy Konstıtýtsııasynyń 30 jyldyǵyna arnalǵan «Konstıtýtsııa jáne memlekettilik: quqyq pen bolashaq dıalogy» atty ǵylymı-praktıkalyq konferentsııada sóılegen sózinde aıtty, dep habarlaıdy Aqordanyń baspasóz qyzmeti.
– Qazir Qazaqstannyń barlyq aımaǵynda myńdaǵan shaqyrym jol salynyp, jóndelýde. Áýejaılar men kópirler boı kóterip, sý nysandarynyń qurylysy bastalyp jatyr. Turǵyn-úı kommýnaldyq sharýashylyǵy jáne basqa da mańyzdy ınfraqurylym salynýda. Jalpy Úkimetke ınfraqurylymdyq qurylystyń sapasyna basa mán berý qajet degen qatań nusqaý berildi. Bul másele Úkimettiń jáne quqyq qorǵaý mekemeleriniń baqylaýynda bolady.
Elimizde jyl saıyn kóptegen óndiris oryny ashylatyn boldy. Ásirese, joǵary tehnologııa salasyndaǵy kásiporyndar iske qosylýda. Osylaısha, biz ulttyq ekonomıkamyzdyń myqty ındýstrııalyq negizin qalap jatyrmyz. Investıtsııa tartyp, bızneske qolaıly jaǵdaı jasap, aımaqtardy qoldaý úshin júıeli jumys istelýde. Sonyń nátıjesinde bıylǵy jeti aıdaǵy ekonomıkalyq ósim 6 paıyzdan asty. Munyń bári aıaq astynan paıda bolǵan joq. Bul – qajyrly eńbektiń jáne tabandy túrde jasalǵan túbegeıli reformalardyń nátıjesi.
Júıeli jáne úılesimdi jumys pen berekeli birliktiń arqasynda elimiz jańa kezeńge qadam basty. Bir sózben aıtqanda, Qazaqstan birtindep damýdyń dańǵyl jolyna túsip keledi. Endi bos sózge berilmeı, jan-jaqty órkendeýge bastaıtyn osy baǵdarymyzdan aınymaı, tek qana alǵa umtylýymyz kerek. Sonda biz ozyq oıly ult bolyp, teńdessiz tabysqa qol jetkizemiz, bıik belesterdi baǵyndyramyz, - dedi Prezıdent.
Óz kezeginde Memleket basshysy Konstıtýtsııamyzdyń ár babyn múltiksiz oryndaý barshaǵa ortaq mindet ekenin basa aıtty.
– Biz bárimiz tól tarıhymyzǵa qazaqtyń qaıta jańǵyrý dáýiriniń ókili retinde enýge tıispiz. Sebebi bárimiz bir dáýirde ómir súremiz, elimizdiń bolashaǵyna birge jaýaptymyz. Bizdiń urpaq mindetti túrde úlken jetistikke kýá bolyp, tabysqa jetýi kerek. Balalarymyz ben nemerelerimizge damyǵan, órkenıetti, quqyqtyq el qaldyrýymyz qajet. Bul – bizdiń tarıhı boryshymyz. Osy maqsatqa jetý úshin biz qazir Ádiletti, Taza, Qaýipsiz ári Qýatty Qazaqstandy quryp jatyrmyz. Túptep kelgende, bul – ulttyq ıdeologııa.
Bizdiń basty mindetimiz – ozyq oıly, básekege qabiletti ult bolý, halyqtyń ál-aýqatyn arttyrý, eldegi turaqtylyqty saqtap, qoǵamdyq kelisimdi qamtamasyz etý. Sondyqtan qazaq eliniń qasterli tólqujaty – Konstıtýtsııamyzdyń ár baby múltiksiz oryndalady. Bul – barshaǵa ortaq mindet. Bárińizge málim, men 8 qyrkúıekte halyqqa Joldaýymdy jarııalaımyn. Elimizdiń ekonomıkalyq jáne áleýmettik saıasatyndaǵy mańyzdy maqsat-mindetterdi aıqyndaımyn, - dep atap ótti Qasym-Jomart Toqaev.
Sóz sońynda Prezıdent qazaqstandyqtardy aıtýly merekemen quttyqtady.
– Konstıtýtsııamyzdyń 30 jyldyǵy – elimiz úshin tarıhı meje. Búgin aramyzda Konstıtýtsııamyzdyń alǵashqy jobalaryn ázirleýge qatysqan azamattar otyr. Sońǵy konstıtýtsııalyq reformany júzege asyrýǵa belsene atsalysqan burynǵy depýtattar men belgili ǵalymdar bar. Bárińizge zor rızashylyǵymdy bildiremin. Men Konstıtýtsııanyń 30 jyldyǵyna oraı memlekettik nagradamen, sonyń ishinde merekelik medaldar bar, bir top azamatty marapattaý týraly sheshim qabyldadym. Barshańyzǵa amandyq, tabys tileımin. Konstıtýtsııamyzdyń aıbyny asqaq bolsyn, - dedi Prezıdent.
Sonymen qatar jıynda Konstıtýtsııalyq sottyń tóraǵasy Elvıra Ázimova, BUU-nyń Qazaqstan Respýblıkasyndaǵy turaqty ókili Sarangoo Radnaaragchaa, Zań konsýltanttarynyń respýblıkalyq alqasynyń tóraǵasy Serik Aqylbaı, Parlament Májilisi Zańnama jáne sot-quqyqtyq reforma komıtetiniń tóraǵasy Snejanna Imasheva, BUU-nyń Adam quqyqtary jónindegi komıtetiniń múshesi, Ózbekstan Respýblıkasynyń Adam quqyqtary jónindegi ulttyq ortalyǵynyń dırektory Akmal Saıdov sóz sóıledi.
Eske sala keteıik, buǵan deıin Prezıdenttiń Qazaqstan Respýblıkasy Konstıtýtsııasynyń 30 jyldyǵyna arnalǵan «Konstıtýtsııa jáne memlekettilik: quqyq pen bolashaq dıalogy» atty ǵylymı-praktıkalyq konferentsııada sóılegen sózin jarııalaǵan edik. Onda Memleket basshysy osydan 30 jyl buryn búkilhalyqtyq referendýmda Qazaqstan Respýblıkasynyń Konstıtýtsııasy qabyldanǵanyn atap ótti.