Prezıdent Qazaqstan-Bavarııa tehnologııalyq forýmynyń ashylýynda sóz sóıledi
ASTANA. KAZINFORM – Qazaqstan Prezıdentiniń Germanııa Federatıvtik Respýblıkasyna resmı sapary bıznes, ónerkásip jáne tehnologııa kóshbasshylarynyń basyn qosqan Qazaqstan-Bavarııa tehnologııalyq forýmymen qorytyndylandy, dep jazdy Aqorda.
Qasym-Jomart Toqaev jıynǵa qatysýshylar aldynda sóılegen sózinde Bavarııany tehnologııalyq progress pen ónerkásiptik jetistikteri baı mádenı murasymen, berik dástúrlerimen jáne jańashyldyq rýhymen úılesim tapqan biregeı óńir dep atady.
– Nemis bıznesi elimizde myqty sapasymen, senimdiligimen jáne tehnologııalyq artyqshylyǵymen joǵary baǵalanady. Búginde ekonomıkalyq baılanystardy tereńdetýge barlyq múmkindik bar. Bul rette Eýropanyń jetekshi ónerkásiptik aımaqtarynyń biri, ınjenerııa men joǵary tehnologııanyń ortalyǵy retinde dúnıe júzi moıyndaǵan Bavarııanyń alatyn orny erekshe. Bizdiń azamattarymyz úshin «Germanııada jasalǵan» degen belgi árqashan sapa men senimdilik sınonımi sanalady. Dál osy sebepti Mıýnhenge arnaıy kelip, Bavarııanyń saıası basshylyǵymen jáne iskerlik orta ókilderimen tikeleı dıalog qurǵandy jón dep uıǵardym, – dedi Prezıdent.
Memleket basshysy Bavarııa Germanııanyń federaldyq jerleri arasynda Qazaqstannyń basty saýda seriktesteriniń biri ekenin aıtty.
– Qazaqstan bul aımaqqa, negizinen, munaı, ferroqorytpa, bolat, mys, alıýmınıı, beıorganıkalyq hımııalyq zattar, maıly daqyldar, bıdaı jáne basqa da taýarlar eksporttaıdy, – dedi Qasym-Jomart Toqaev.
Aıta keteıik, Bavarııa bıznesi Qazaqstanmen ózara tıimdi kooperatsııany damytýǵa qyzyǵýshylyq tanytty.
