Prezıdent «Qazaqstan balalary» tujyrymdamasyn sapaly iske asyrýdy tapsyrdy
ASTANA. KAZINFORM — Memleket basshysy Bala quqyqtary jónindegi ýákil Dınara Zákıevany qabyldady, dep habarlaıdy Aqordanyń baspasóz qyzmeti.
Qasym-Jomart Toqaevqa bala quqyqtaryn qorǵaý baǵytynda atqarylyp jatqan júıeli jumystar týraly málimet berildi.
Dınara Zákıevanyń aıtýynsha, bıyl «Qazaqstan balalary» tujyrymdamasy qabyldandy. Densaýlyq saqtaý, bilim berý, áleýmettik qorǵaý jáne qaýipsizdik salalaryndaǵy bala quqyqtaryn qamtamasyz etý sharalary júıelendi. Jaǵdaıdy jiti saraptaý negizinde bes jylǵa arnalǵan is-qımyl jospary ázirlendi. Qujat áleýmettik qoldaýdy jáne bala quqyqtaryn qorǵaýdy kúsheıtetin 158 sharany qamtıdy.
Memleket basshysyna oblys ákimdikterinde Balalar quqyǵyn qorǵaý basqarmalaryn qurý jumysy aıaqtalyp, olardyń quzyretteri ulttyq zańnamada bekitilgeni jóninde baıandaldy. Qazirgi ýaqytta qajetti uıymdastyrý rásimderi qolǵa alynǵan.
Bıyl 9 óńirdegi ahýalǵa monıtorıng júrgizilip, balalardyń psıhologııalyq salamattylyǵyn qamtamasyz etýge jáne olardyń quqyqtarynyń buzylýynyń aldyn alýǵa baǵyttalǵan is-sharalar sapasy zerdelendi.
Prezıdentke Psıhologııalyq qoldaý ortalyqtaryn qurý jáne psıhologııalyq salamattylyqty aıqyndaýdyń biryńǵaı baǵdarlamasyn engizý jóninde aqparat berildi. Bul jergilikti deńgeıde erekshe nazar aýdarýdy jáne qoldaýdy qajet etetin balalarǵa júıeli kómek kórsetýge septigin tıgizdi.
— Sondaı-aq Dınara Zákıeva 111 memlekettik baılanys ortalyǵyna túsetin ótinishter boıynsha júrgizilgen jumysqa toqtaldy. Mektepterde QR-111 júıesiniń engizilýi balalarmen tikeleı baılanys ornatý jáne olardyń quqyqtarynyń buzylý faktilerin anyqtaý barysynda tıimdi bolǵanyn kórsetip otyr. Atalǵan qural iske qosylǵannan beri, ıaǵnı, 2024 jyldyń qazan aıynan 2026 jyldyń maýsym aıyna deıin balalardan 167 myń habarlama men 4 523 qońyraý kelip túsken, — delingen habarlamada.
Balalarǵa arnalǵan ınfraqurylymdy, sonyń ishinde aýyldyq jerlerdegi nysandardy damytý men jaqsartý, sondaı-aq ata-analardy qoldaý jáne balalar qaýipsizdigi úshin olardyń jaýapkershiligin kúsheıtý máselelerine aıryqsha nazar aýdaryldy.
Prezıdent «Qazaqstan balalary» tujyrymdamasyn sapaly júzege asyrý maqsatynda Bala quqyqtary jónindegi ýákildiń, Úkimettiń jáne jergilikti atqarýshy organdardyń kúsh-jigerin jumyldyrý mańyzdy ekenin atap ótti.
Buǵan deıin Prezıdent saılaý, prokýratýra jáne áleýmettik zańnamaǵa qatysty birneshe zańǵa qol qoıdy.
