Prezıdent Qazaq ulttyq ýnıversıtetiniń ǵylymı áleýetimen tanysty
ASTANA. KAZINFORM – Memleket basshysy Qasym-Jomart Toqaev Almaty qalasyna jumys sapary aıasynda ál-Farabı atyndaǵy Qazaq ulttyq ýnıversıtetine bardy. Bul týraly Aqordanyń baspasóz qyzmeti málim etti.
QazUÝ rektory — basqarma tóraǵasy Janseıit Túımebaev Memleket basshysyna Innovatsııalyq ónimder ortalyǵynyń jáne Farabi Hub-tyń joǵary tehnologııalyq jobalaryn kórsetti.
— Hab ekonomıkanyń naqty sektoryna ınnovatsııalyq ázirlemeler engizýdi kózdeıtin zamanaýı platforma retinde qurylǵan. Onyń bazasynda kreatıvti ındýstrııa, jasandy ıntellekt pen startap jobalary iske asyrylady. Osy arqyly 300 jańa jumys orny ashylyp, 20 mıllıon dollardan asa ınvestıtsııa tartyldy, — delingen habarlamada.
Ortalyqta ZTE, BASF, Binlin tehnologııalyq korporatsııalarynyń, sondaı-aq basqa da sheteldik jetekshi ǵylymı uıymdardyń zertteý alańdary ornalasqan. Budan bólek, munda QazUÝ-diń ǵylymı-zertteý ınstıtýttary jumys isteıdi.
Prezıdentke ýnıversıtet jalpy quny 1 mıllıard 250 mıllıon teńgeni quraıtyn tórt iri jobany júzege asyryp jatqany jóninde málimet berildi.
Memleket basshysyna Qytaıdyń Soltústik-batys polıtehnıkalyq ýnıversıtetimen birlese ázirlengen mıkrospýtnık maketi kórsetildi.
Joǵary oqý oryndarynyń ǵalymdary NKSAT spýtnıgin jasap jatyr. Ol Jerdiń tartylys aýmaǵy men radıatsııa deńgeıin ólsheýge, geologııalyq barlaý jumystaryn júrgizýge arnalǵan.
— Qasym-Jomart Toqaevqa «Qashyqtan zondtaý jáne ony qoldaný tehnologııasy» zerthanasynyń qyzmeti tanystyryldy. Bul keshen QHR Ǵylym akademııasymen birlese ashyldy. Zerthanada jasandy jer serikteriniń derekteri negizinde Ortalyq Azııadaǵy klımat jáne ekologııa ózgeristeri zerdelenedi, — dep habarlady Aqordadan.
Memleket basshysy «Tsıfrlyq tehnologııalar men robotty tehnıka» halyqaralyq ınstıtýtyn jáne Robotty tehnıka ortalyǵyn, sondaı-aq Qazaqstan-Sıngapýr kvanttyq tehnologııalar ortalyǵyn aralap kórdi.
Qasym-Jomart Toqaevqa ýnıversıtet bazasynda ornalasqan sýperkompıýter klasteri kórsetildi. Ony qurýǵa 23 mıllıon dollar ınvestıtsııa tartylǵan.
Klaster kúrdeli esepteýlerdi oryndaý merzimin aıtarlyqtaı qysqartyp, ǵylymı zertteýlerdiń tıimdiligin arttyrady. Sondaı-aq ІT jáne jasandy ıntellekt salasynda mamandar daıarlaýǵa keńinen jol ashady.
Aıta keteıik, buǵan deıin AQSh prezıdenti Qasym-Jomart Toqaevty Maıamıde ótetin G20 sammıtine shaqyrdy.
