Prezıdent qazaq tilin BUU resmı tilderimen jalǵaıtyn sózdikter ázirleýdi tapsyrdy


ASTANA. KAZINFORM – Memleket basshysy Qasym-Jomart Toqaev BUU-nyń resmı tilderimen jalǵaıtyn eki tildi jáne kóptildi sózdikter ázirleýdi tapsyrdy.

«Qazaq tili» qoǵamynyń H quryltaıy
Foto: Soltan Jeksenbekov / Kazinform

Prezıdenttiń aıtýynsha, qazaq tilin halyqaralyq tilder qaýymdastyǵynda óz orny bar til retinde damytýymyz kerek. Ana tilimizdiń ózge tildermen baılanysyn qamtamasyz etý óte mańyzdy.

– Osy oraıda, «Qazaq tili» qoǵamy júzege asyrǵan Oxford Qazaq Dictionary jobasyn jalǵastyrý kerek dep esepteımin. Men ózim bul sózdikti qarap shyqtym. Jalpy, paıdaly eńbek dep sanaımyn, – dedi Melmeket basshysy «Qazaq tili» qoǵamynyń H quryltaıynda.

Sonymen birge, qazaq tilin Birikken Ulttar Uıymynyń negizgi resmı tilderimen jalǵaıtyn sapaly eki tildi jáne kóptildi sózdikter ázirleıtin ýaqyt keldi.

– Qazaq-frantsýz, qazaq-ıspan, qazaq-qytaı, qazaq-arab, sonymen qatar, qazaq-nemis, qazaq-ıtalıan, qazaq-japon, qazaq-koreı, qazaq-parsy sózdikterin jasaý qajet. Qazaq-orys sózdigin ýaqyt talabyna saı jańartqan jón, – dedi ol.

Prezıdent sózdikterdiń elektrondyq nusqasyn ázirlep, únemi tolyqtyryp otyrý kerektigin aıtty.

– Tildiń halyqaralyq baılanysyn nyǵaıtý arqyly mádenı jáne ǵylymı yqpaldastyqqa jol ashylady, elimizdiń zııatkerlik áleýeti artady, – dedi Q. Toqaev.

Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóılep jatyr.

Prezıdent qazaq tiliniń abyroı-bedelin arttyrý úshin tabandy jumys isteý kerektigin aıtýda.

Jańa Konstıtýtsııada «Táýelsizdik» jáne «Egemendik» sózderin bas árippen jazylatyn boldy.