Prezıdent: Qazaq – kez kelgen syn-qaterdi eńserýge daıyn jurt
ASTANA. KAZINFORM – Óskeleń urpaqty ótkenge ókpe artatyn kózqarastan aryltyp, talapty, bilimpaz, jańashyl ári eńbekqor azamat etip tárbıeleý qajet. Bul týraly Memleket basshysy Qasym-Jomart Toqaev respýblıkalyq Tamyz konferentsııasynda aıtty.
Memleket basshysy uly Abaıdyń «Adam balasynyń eń jamany – talapsyz» degen sózin mysalǵa keltirdi.
– Ózine senimsiz, jasyq, ár nársege muńaıa beretin, únemi kúızeliste júretin kertartpa adamnyń bolashaǵy bulyńǵyr. Taǵy da aıtyp keteıin. Qazaq – kez kelgen syn-qaterdi eńserýge daıyn jurt, keleshegine senimmen qarap, alǵa qaraı batyl qadam basatyn naǵyz jeńimpaz ult. Ótkenge ókpe artyp, tarıhtaǵy sátsizdikter úshin basqa halyqtar men memleketterdi aıyptaý – bolmysymyzǵa múldem jat dúnıe, – dedi Qasym-Jomart Toqaev.
Prezıdent mundaı teris túsinikterden óskeleń urpaqty qorǵaýda bilim berý salasyna úlken jaýapkershilik júkteletinin atap ótti.
– Sondyqtan ustazdarymyz eń aldymen oıy taza, nıeti túzý, jaqsylyqqa, jarqyn bolashaqqa senimi zor jigerli azamattardy tárbıeleýge tıis. Otanshyl, bilimpaz, jańashyl, talapty, eńbekqor adamdar eldiń kóshin alǵa bastaıdy, – dedi Memleket basshysy.
Qasym-Jomart Toqaev qazirgi jastardyń boıynan osy qasıetterdi kóretinin aıtty.
– Rıza bolatynym: men osy qasıetterdi óskeleń urpaqtyń boıynan anyq kóremin. Jastarymyz árdaıym jaqsylyqqa umtylady, elimizdiń keleshegine zor senimmen qaraıdy, – dedi Prezıdent.
Memleket basshysy naǵyz otanshyldyqtyń negizi – tabandy eńbek ekenin de atap ótti.
– Naǵyz otanshyldyq degenimiz – jemisti, tabandy eńbek. Ár saladaǵy eńbek mańyzdy, onyń jamany nemese ultqa zııan ákeletini bolmaıdy. Eńbek – eń joǵary deńgeıdegi qasıetti dúnıe. Al, memlekettiń mindeti – osyndaı eńbekqor adamdarǵa laıyqty qurmet kórsetý, olardy marapattaý. Alysqa kóz tigetin jasampaz ulttyń shynaıy bolmysy osyndaı bolady, – deıdi Memleket basshysy.
Buǵan deıin Prezıdent 7 myń bala qant dıabetine shaldyqqanyn aıtyp, fast-fýd jarnamasyn muqııat zerdeleýdi tapsyrǵan edi.
Sondaı-aq Qasym-Jomart Toqaev 16 jasqa tolmaǵandardyń áleýmettik jelide tirkelýine tyıym salý týraly zań jobasyn Quryltaıda qaraýdy usynyp, balalarǵa arnalǵan SIM-kartalardy engizýdi tapsyrdy.
