Prezıdent: qazaq-qatar yntymaqtastyǵy tyń serpinmen damıdy

ASTANA. QazAqparat – Bolashaqta qazaq-qatar yntymaqtastyǵy tyń serpinmen damıdy. Bul týraly búgin Aqordada Qatar Ámiri sheıh Támım ben Hamad Ál Tánımen keńeıtilgen quramdaǵy kelissózderden keıingi birlesken málimdeme barysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Búgingi ekijaqty kezdesýdiń nátıjesinde mańyzdy máselelerdi talqylap, birqatar kelisimge keldik. Joǵary mártebeli sheıh Támımniń elimizge osy sapary saıası, saýda-ekonomıkalyq, ınvestıtsııalyq, mádenı-gýmanıtarlyq jáne basqa salalardaǵy yntymaqtastyqty odan ári nyǵaıtýǵa múmkindik beredi», - dedi Prezıdent.

Qazaqstan men Qatar ekijaqty qarym-qatynastaǵy saýda-ekonomıkalyq jáne ınvestıtsııalyq yntymaqtastyqqa basa nazar aýdarady.

«Alaıda, koronavırýs indeti jáne geosaıası ahýal áleýetimizdi tolyq paıdalanýǵa múmkindik bermedi. Sol sebepti keıingi jyldary saýda-sattyǵymyz báseńdep ketti. Endigi maqsatymyz – elderimiz arasyndaǵy taýar aınalymyn jańdandyrý. Buǵan qolaıly jaǵdaı jasaldy. Ekonomıkalyq baılanysty keńeıtý jolynda úkimetaralyq komıssııa jáne iskerlik keńester mańyzdy ról atqarady. Qazirgi ýaqytta Qatardyń birneshe kompanııasy Qazaqstannyń aýyl sharýashylyǵy salasynda tabysty jumys istep keledi. Olardyń ónimi birqatar memleketke eksporttalady. Sondaı-aq, biz geologııalyq barlaý, taý-ken ónerkásibi, kólik-logıstıka, qarjy jáne bank sektoryn damytýǵa ýaǵdalastyq. Osyǵan oraı, búgin mańyzdy qujattarǵa qol qoıdyq. Bolashaqta qazaq-qatar yntymaqtastyǵy tyń serpinmen damıdy dep senemin», - dedi Qasym-Jomart Toqaev.

Foto : t.me/bort_01