Prezıdent qazaq-frantsýz bıznes forýmyna qatysty
Memleket basshysy Qasym-Jomart Toqaev pen Frantsııa Prezıdenti Emmanıýel Makron qazaq-frantsýz bıznes-forýmynyń ashylýyna qatysty, dep habarlaıdy Kazinform Aqordanyń baspasóz qyzmetine silteme jasap.
Memleket basshysy bıyl Qazaqstanda ekonomıkalyq ósim kórsetkishi 4,7 paıyz deńgeıine jetkenin, ásirese, munaıdan tys salalarda eleýli progress bar ekenin atap ótti. Prezıdenttiń aıtýynsha, Qazaqstan 2029 jylǵa qaraı ulttyq ekonomıkanyń kólemin eki ese arttyrýdy strategııalyq maqsat etip otyr.
Qasym-Jomart Toqaev el ekonomıkasyna shetelden ınvestıtsııa tartý isine aıryqsha mán beriletinin málimdedi. Qazaqstanǵa shetelden kelgen tikeleı ınvestıtsııa kólemi Ortalyq Azııadaǵy basqa elderge salynǵan ınvestıtsııalardyń jalpy kóleminen asyp túsedi.
Prezıdent Qazaqstan men Frantsııa arasyndaǵy ekonomıkalyq yntymaqtastyq nátıjeli damyp kele jatqanyna nazar aýdardy.
«Qazirgi kúrdeli geosaıası ahýalǵa qaramastan, byltyr ekijaqty taýar aınalymy 30 paıyzǵa artyp, 4 mıllıard dollarǵa jetti. Osy oń úrdis bıyl da saqtalyp otyr. Frantsııa – bizdiń ekonomıkamyzǵa 19 mıllıard dollarǵa jýyq qarjy quıǵan eń iri halyqaralyq ınvestorlardyń biri. Bıyl alǵashqy alty aıda frantsýz seriktesterimizdiń Qazaqstanǵa salǵan tikeleı ınvestıtsııasy 50 paıyzǵa artty. Bul – tańǵalarlyq ósim ári elimizge degen joǵary senimniń belgisi», – dedi Prezıdent.
Memleket basshysy búginde elimizde eki júzge jýyq frantsýz kompanııasy jumys isteıtinin aıtty. Olardyń ishinde energetıka sektorynda – Total Energies, Orano, Air Liquide, ónerkásip salasynda – Airbus, Saint-Gobain, temirjol salasynda – Alstom, agrarlyq azyq-túlik óndirisi sektorynda – Lactalis jáne Danone kompanııalary bar.
