Prezıdent qaıtkende qazaq halqy órkenıetti qoǵam bolatynyn aıtty
ASTANA. KAZINFORM – Jańashyl, jasampaz bolý – kóshpendilerdiń bolmysyna tán turmys salty. Bul týraly VI Dúnıejúzilik kóshpendiler oıyndary jeńimpazdaryn marapattaý rásiminde Memleket basshysy Qasym-Jomart Toqaev aıtty.
- Túptep kelgende Kóshpendiler oıyndarynyń mártebesi barshamyzdyń ortaq abyroıymyz. Búkil álem túrki halyqtaryna kóz tigip otyr. Bizdiń tarıh pen mádenıetke úlken nazar aýdarýda. Sondyqtan bul jarysty birlese damytýǵa bárimiz múddeli bolýymyz kerek. Qyrǵyzstan osy ortaq iske belsene atsalysýǵa qashanda daıyn. Eki baýyrlas elge ata-babalarymyzdan qalǵan eń qundy ósıet – bul ózara qurmet jáne máńgilik dostyq. Osy danalyqty umytýǵa eshqandaı haqymyz joq. Biz - Uly Dala órkenıetiniń zańdy murageriniń birimiz. Batyr babalarymyz ulan-ǵaıyr jerde bizge amanat etti. Salt-dástúrimizdi, rýhanı qundylyqtarymyzdy mura etip qaldyrdy. Qasterli qazynany kózdiń qarashyǵyndaı saqtap, jas býynǵa tabystaý – ortaq paryzymyz, - dedi Memleket basshysy.
Prezıdent osy rýhty boryshty órkenıetti, mádenıetti túrde abyroımen júzege asyrýymyz qajettigin basa aıtty.
- Jalpy, kóshpendiler ómirdi máńgilik qozǵalys dep túsingen. Sondyqtan jańashyl, jasampaz bolý – kóshpendilerdiń bolmysyna tán turmys salty. Maqsaty bıik, jospary aıqyn, bolashaqqa senimmen qaraıtyn ozyq ult retinde Qazaqstan da árdaıym alǵa qaraı umtylyp keledi. Biz, sonyń ishinde ulttyq sportpen aınalysatyn jastar, basqa da sportshylar, memlekettik qyzmetshiler men kásipkerler, dárigerler men ustazdar, stýdentter men ǵalymdar, jumysshylar men basqarýshylar, áskerı qyzmetkerler men mekeme qyzmetshileri – bárimiz mádenıetti, sabyrly bolyp, dańǵaza men aıqaı-shýǵa jol bermeýimiz qajet. Sonda ǵana qazaq halqy tolyqqandy, órkenıetti qoǵam bolady, - dedi Qasym-Jomart Toqaev.
Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.
