Prezıdent Qaýipsizdik keńesi apparatyna jańa mindetter júktedi
ASTANA. KAZINFORM — Prezıdent, Qaýipsizdik Keńesiniń tóraǵasy Qasym-Jomart Toqaev derbes memlekettik organ retinde qurylǵan Qaýipsizdik Keńesi Apparatynyń alǵashqy keńesin ótkizdi. Bul týraly Aqordanyń baspasóz qyzmeti habarlady.
Memleket basshysy Apparattyń jańa mártebesin memlekettik ınstıtýttardy reformalaý úderisimen sabaqtastyra qarastyrý qajet ekenin atap ótti.
Álemdik ahýal qubylyp turǵan kezeńde Qaýipsizdik Keńesi asa mańyzdy máseleler boıynsha naqty ári jan-jaqty saralanǵan sheshimder qabyldaıtyn ortalyqqa aınalýǵa tıis.
Qasym-Jomart Toqaev qazirgi syn-qaterlerdiń sıpaty edáýir ózgergenine nazar aýdardy. Osy oraıda kıberqaýipsizdikti qamtamasyz etýge jáne jasandy ıntellektini qoldanýǵa basa mán berildi.
Qaýipsizdik Keńesiniń Tóraǵasy aldaǵy ýaqytta ózektiligi arta túsetin aqparat, tehnologııa, azyq-túlik, sý jáne energetıka qaýipsizdigi máselelerine erekshe toqtaldy.
Prezıdent atalǵan salalardaǵy basymdyqtardy belgilep, «Zań men tártip» qaǵıdatyn negizgi baǵdar retinde atady.
Keńes qorytyndysy boıynsha Apparatqa birqatar naqty mindetter júkteldi.
Qazaqstannyń ulttyq múddesin, egemendigi men turaqtylyǵyn qorǵaý Qaýipsizdik Keńesi jumysynyń tıimdiligin aıqyndaıtyn basty ólshem bolýǵa tıis.
