Prezıdent Qatar kompanııalaryn álem ekonomıkasyna qajet shıkizat túrlerin óndirý isine atsalysýǵa shaqyrdy
DOHA. KAZINFORM – Qasym-Jomart Toqaev Qatar kompanııalaryn kobalt, lıtıı jáne basqa da álem ekonomıkasyna qajet asa mańyzdy shıkizat túrlerin óndirý jáne óńdeý isine atsalysýǵa shaqyrdy, dep habarlaıdy Aqordanyń baspasóz qyzmeti.
Budan bólek, Memleket basshysy aýyl sharýashylyǵy salasyndaǵy seriktestikke úlken úmit artatynyn atap ótti.
– Qazaqstan terrıtorııasy jaǵynan álemde toǵyzynshy oryn alatyn ári jeriniń 70 paıyzy aýyl sharýashylyǵyna jaramdy el retinde Ortalyq Azııadaǵy astyqty ólke sanalady. Elimizdiń aýyl sharýashylyǵy ónimderi 80-nen astam memleketke eksporttalady. Atalǵan saladaǵy ónimdilikti úsh ese arttyrý arqyly eksportty eki ese ulǵaıtýdy kózdep otyrmyz. Qazaqstan Qatar naryǵyna halal jáne tabıǵı taza aýyl sharýashylyǵy ónimderin jetkizetin senimdi seriktes bola alady. Hassad Food kompanııasy elimizde bıdaı men burshaqty tereń óńdeıtin zaýyt salýǵa qyzyǵýshylyq tanytyp otyrǵanyn bilemin. Biz bul bastamany qoldaýǵa ázirmiz. Sondaı-aq et, jemis-jıdek, kókónis, astyq, un jáne basqa da ónimder óndirisin damytýǵa ári olardy aldaǵy ýaqytta Qatar eline tikeleı tasymaldaý isin jolǵa qoıýǵa múddelimiz, – dedi Qasym-Jomart Toqaev.
Memleket basshysynyń pikirinshe, tsıfrlandyrý sektory – eki eldiń kún tártibindegi basym baǵyttardyń biri. Qazaqstan men Qatar jetekshi tehnologııalyq ortalyqqa aınalýǵa umtylady.
– BUU Qazaqstandy tsıfrlyq tehnologııalardy beıimdeý boıynsha úzdik otyz eldiń qataryna qosty. Sońǵy úsh jyl ishinde IT salasyndaǵy eksport 16 ese ulǵaıyp, shamamen 500 mıllıon dollardy qurady. Básekege qabiletimizdi arttyrý úshin sýperkompıýterler men derekterdi óńdeý ortalyqtaryn qura otyryp, jasandy ıntellektiniń jańa tehnologııalaryn ázirleýge kiristik. Kórshiles eldermen birge Kaspıı teńiziniń tabany arqyly optıkalyq-talshyqty baılanys jelisin júrgizýdi jáne Shyǵanaq elderimen optıkalyq baılanys jelisin keńeıtý múmkindikterin qarastyrýdy kózdep otyrmyz. Power International Holding kompanııasynyń Qazaqstandaǵy telekommýnıkatsııa naryǵynda negizgi oıynshylardyń birine aınalý josparyn quptaımyz, – dedi Memleket basshysy.
Qazaqstan Prezıdenti medıtsına, farmatsevtıka jáne bıotehnologııa salalaryndaǵy baılanystardy eki el yqpaldastyǵynyń taǵy bir mańyzdy baǵyty retinde atap ótti.
Qasym-Jomart Toqaev Astana halyqaralyq qarjy ortalyǵy Qatardyń Ortalyq bankimen, Qatar qarjy ortalyǵymen jáne Qatar qor bırjasymen berik iskerlik baılanys ornatqanyn eske saldy. Onyń pikirinshe, AHQO-da Qazaqstan-Qatar tikeleı ınvestıtsııalar qory qurylsa, ol birlesken kásiporyndardy qarjylandyratyn alań bolar edi. Memleket basshysy sózin qorytyndylaı kele, Qatar bıznesmenderin bıyl maýsym aıynda ótetin Astana halyqaralyq forýmyna qatysýǵa shaqyrdy.
Dóńgelek ústel barysynda Qatardyń Saýda jáne ındýstrııa mınıstri sheıh Muhammed ben Hamad ben Qasym Ál Tánı, Qatar bıznesmenderi qaýymdastyǵynyń tóraǵasy sheıh Feısal ben Qasym Ál Tánı, Qatardyń Saýda-ónerkásip palatasynyń tóraǵasy sheıh Halıfa ben Djasım ben Muhammed Ál Tánı, Nebras Power kompanııasynyń bas dırektory Halıd Muhammed Djolo, Hassad Food kompanııasynyń bas atqarýshy dırektory Álı Hılıal Ál Kývarı, Qatar Free Zone uıymynyń bas dırektory sheıh Muhammed ben Hamad Ál Tánı jáne basqalar sóz sóıledi. Dóńgelek ústel qorytyndysy boıynsha Qazaqstan men Qatar isker toptarynyń arasynda birqatar qujatqa qol qoıyldy.
