Prezıdent Qatar Ámirimen kelissóz júrgizdi
DOHA. KAZINFORM – Memleket basshysy Qatar Ámiriniń shaqyrýyn zor rızashylyqpen qabyl alǵanyn jetkizdi. Prezıdent osy elge alǵash ret memlekettik saparmen kelip otyrǵanyn, sondyqtan onyń mán-mańyzy erekshe ekenin atap ótti. Bul týraly Aqordanyń baspasóz qyzmeti málimdedi.
– Qatar – ıslam álemindegi bizdiń senimdi ári mańyzdy áriptesimiz. Eki eldiń qarym-qatynasyna tyń serpin beretin kez keldi dep oılaımyn. Qazaqstan men Qatar baılanystaryn tolyq strategııalyq áriptestik deńgeıine kóterýdi usynamyn. Sapar kezinde óte mańyzdy qujattarǵa qol qoıylady. Bul kelisimder bizdiń yntymaqtastyǵymyzdy strategııalyq deńgeıge kóteredi. Biz úshin Qatar óte erekshe el, sizdermen baılanystarymyzdy joǵary baǵalaımyz. Sondyqtan bul qatynastarymyzdy odan ári damytý úshin kúsh-jigerimizdi salamyz. Bizge kórsetilgen qonaqjaılyǵyńyzǵa rızashylyǵymyzdy bildiremiz, – dedi Qasym-Jomart Toqaev.
Qatar Memleketiniń Ámiri sheıh Támım ben Hamad Ál Tánı Qazaqstan Prezıdenti saparynyń mán-mańyzyna toqtaldy.
– Joǵary Mártebeli Prezıdent myrza, bizdiń elimizge eń alǵashqy memlekettik saparmen kelip otyrǵanyńyzǵa qýanyshtymyn. Búgingi kelissózder eki el arasyndaǵy qarym-qatynastardy eseleı túsetinine senemin. Biz Astanada da kezdestik. Búgingi júzdesýimiz burynǵy kelissózder negizinde qol jetkizilgen ýaǵdalastyqtardyń júzege asyrylýyn qadaǵalap, aldaǵy josparlardy aıqyndaýǵa múmkindik beredi. Ekijaqty yntymaqtastyq aıasynda energetıkalyq, saýda-ekonomıkalyq jáne ınvestıtsııalyq jobalardy iske asyrýǵa múddelimiz. Osy sapar aıasynda bizdiń eldiń iri bıznes ókilderimen kezdesýler ótkizesiz. Bul atalǵan salalardaǵy yqpaldastyqty ilgeriletýge tyń serpin beretinine senimdimin, – dedi Qatar Memleketiniń Ámiri.
Memleket basshysy qazir qazaq-qatar qarym-qatynastary keıingi 30 jylda eń jaqsy kezeńdi bastan ótkerip otyrǵanyn atap ótip, Ámirdiń Astanaǵa jasaǵan memlekettik saparyn eske saldy
Prezıdenttiń aıtýynsha, elderimiz arasynda tyǵyz saıası dıalog, keńeıip kele jatqan ekonomıkalyq seriktestik jáne tabysty mádenı-gýmanıtarlyq baılanystar qalyptasqan. Eki el arasynda sońǵy úsh jylda qol qoıylǵan kelisimder ártúrli saladaǵy yntymaqtastyqty odan ári nyǵaıtýǵa berik negiz boldy.
Qasym-Jomart Toqaev Qatardy jaqyn bolashaqta Qazaqstandaǵy eń iri ınvestorlardyń ondyǵyna kiredi dep esepteıtinin jetkizdi. Prezıdent Qazaqstannyń Qatar naryǵyna jalpy quny 250 mıllıon dollar bolatyn 60 shıkizattyq emes taýar túri boıynsha eksportty ulǵaıtýǵa daıyn ekenin aıtty. Sonymen qatar jaqyn arada taýar aınalymyn 500 mıllıon dollarǵa deıin arttyrý týraly aıtyldy.
Kelissóz barysynda aýyl sharýashylyǵy, kólik-logıstıka, týrızm máseleleri talqylandy. Atap aıtqanda, Memleket basshysy Qatardy Shyǵanaq pen Ortalyq Azııany baılanystyratyn ıntermodaldy kólik jelisin damytý úshin kúsh-jiger biriktirýge shaqyrdy. Bul aımaqtaǵy ekonomıkalyq belsendilikti yntalandyrýǵa yqpal etedi. 2030 jylǵa qaraı sýarmaly jer kólemin 3 mıllıon gektarǵa deıin ulǵaıtýdy josparlap otyrǵan elimiz qazir bıdaı men un óndirý boıynsha álemde alǵashqy ondyqqa kiredi. Qasym-Jomart Toqaev aýyl sharýashylyǵy salasyndaǵy yntymaqtastyqty arttyrýǵa negiz bar ekenine nazar aýdardy.
Sonymen qatar mádenı-gýmanıtarlyq baılanystardy nyǵaıtý máselesi talqylandy. Memleket basshysy 2025 jyly eki el astanalarynda Qazaqstan men Qatardyń mádenıet kúnderin uıymdastyrýdy usyndy. Bul sharalar mádenı murasy baı halyqtarymyzdy jaqyndata túsetinine senim bildirdi.
Budan bólek, aımaqtyq jáne halyqaralyq kún tártibindegi ózekti máseleler qarastyryldy.
