Prezıdent kásipqoı boksshy Jánibek Álimhanulyn jeńisimen quttyqtady

ASTANA. KAZINFORM — Memleket basshysy kásipqoı boksshy Jánibek Álimhanulyn orta salmaqta WBO jáne IBF tujyrymdary boıynsha chempıondyq belbeýlerin sátti qorǵaýymen quttyqtady.

Bul týraly Prezıdenttiń baspasóz hatshysy Rýslan Jeldibaı Telegram-arnasynda habarlady.

— Qasym-Jomart Toqaev sportshynyń joǵary deńgeıdegi sheberligi men tabandylyǵy, týǵan jerimizde el namysyn abyroımen qorǵaýy barshamyz úshin zor maqtanysh ekenin atap ótti. Prezıdent Jánibektiń budan da úlken jeńisterge jete berýine tilektestik bildirdi, — delingen habarlamada.

Eske salsaq, búgin «Barys Arena» muz saraıynda otandyq jáne sheteldik boks juldyzdarynyń qatysýymen úlken tarıhı boks keshi ótip jatyr.

Keshtiń basty jekpe-jeginde el tarıhynda alǵash ret IBF jáne WBO tujyrymy boıynsha orta salmaqtaǵy álem chempıony Jánibek Álimhanuly (16-0, 11 KO) óz belbeýin Frantsııadan kelgen úmitker Anaýel Ngamıssıngege (14-0, 9 KO) qarsy qorǵaıtyny habarlandy.

Búgin Jánibek Álimhanuly qarsylasyn nokaýtpen jeńip, chempıondyq beldikterin sátti qorǵap shyqty.