Prezıdent: Kásipkerlerdi qoldaý úshin yńǵaıly tsıfrlyq ekojúıe qalyptastyrý qajet

ASTANA. KAZINFORM — Bul týraly Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattaý rásiminde aıtty.  

— Qazir EgovBusiness platformasy jumys istep tur. Sonyń arqasynda memleket tarapynan kórsetiletin qyzmetter qoljetimdi bola tústi. Kásipkerlerdiń jumysy jeńildep, qaǵazbastylyq azaıdy. Bıyldyń ózinde osy qosymsha arqyly 4,6 mıllıonnan astam qyzmet kórsetildi. Endi platformany Bıznestiń tsıfrlyq kartasymen ózara baılanystyrý jumysyn aıaqtaý qajet. Sonymen birge osy platformaǵa jergilikti atqarýshy organdar kórsetetin qyzmet túrlerin qosý kerek, — dedi ol.

Bul sharalar kásipkerlerdiń birtutas platforma arqyly ártúrli qyzmet alýyna múmkindik beredi.

— Sondaı-aq platformada jasandy ıntellekt kómegimen bıznes júrgizýge qatysty tolyqqandy keńes alýǵa bolady. Mundaı qadam ákimshilik kedergilerdi azaıtyp, memlekettik qoldaý sharalarynyń ashyq ári tıimdi bolýyna yqpal etedi, — dedi Memleket basshysy. 

Aıta ketelik Prezıdent jasandy ıntellekt JІÓ-ge 20 mlrd dollar qosýy múmkin ekenin aıtqan edi.