Prezıdent: Kaspııdiń tartylýyna qarsy sharalar ázirge jetkiliksiz
ASTANA. KAZINFORM — Qazaqstan Kaspıı teńiziniń tartylýyna qarsy memleketaralyq baǵdarlama ázirleýdi usyndy. Kaspıı ekologııa sammıtinde Prezıdent Qasym-Jomart Toqaev Soltústik Araldy qalpyna keltirý tájirıbesin mysalǵa keltirip, teńizdi saqtaýǵa baǵyttalǵan sharalar ázirge jetkiliksiz ekenin málimdedi. Bul týraly Memleket basshysy Kaspıı ekologııa sammıtinde aıtty.
Memleket basshysy orny tolmastaı kóringen apattan keıin tabıǵatty qaıta túletýge qatysty jarqyn mysaldar keltirdi.
— Biz Soltústik Aral teńiziniń aıdynyn 36 paıyzǵa ulǵaıta aldyq. Sonyń nátıjesinde sýdyń sapasy jaqsaryp, balyq qory qaıta qalpyna keldi. Teńiz mańyndaǵy aýmaqtardyń turmys-tirshiligine qan júgirdi. Bıoalýantúrlilikti saqtaý — ekologııalyq saıasatymyzdyń mańyzdy baǵyty. Dáıekti sharalardyń arqasynda kıik sany ósti. Qar barysynyń popýlıatsııasy saqtalyp otyr. Janýarlardyń sırek túrleri tabıǵı ortaǵa oralýda. Osy oń tájirıbeni Kaspıı teńiziniń biregeı ekojúıesin saqtaý úshin qoldanýǵa bolady dep oılaımyz. Biz Turan jolbarysyn qalpyna keltirýdi kózdeıtin arnaıy baǵdarlamany qolǵa aldyq. Osy oraıda, birneshe Amýr jolbarysyn elimizge jersindirýge bergeni úshin Prezıdent Vladımır Pýtınge jáne Reseı Federatsııasynyń Úkimetine rızashylyǵymdy bildiremin. Qazir olar jergilikti tabıǵat jaǵdaıyna oıdaǵydaı beıimdelýde, — dedi Qasym-Jomart Toqaev.
Prezıdent Kaspıı yntymaqtastyǵynyń berik halyqaralyq quqyqtyq jáne ınstıtýtsıonaldyq negizi qalyptasqanyn málimdedi.
— Tegeran konventsııasynyń máni zor. Bıyl onyń kúshine engenine 20 jyl toldy. BUU Qorshaǵan orta baǵdarlamasy tabıǵatty qorǵaý jumysyna aıtarlyqtaı úles qosyp keledi. Qazaqstan premer-mınıstrlerdiń orynbasarlary deńgeıinde Kaspıı teńiziniń tartylýyna qatysty úkimetaralyq komıssııa qurý jónindegi Ázerbaıjannyń usynysyn qoldaıdy. Kaspıı mańyndaǵy elder Teńizdiń sý resýrsyn saqtaý boıynsha memleketaralyq baǵdarlama ázirleý týraly Qazaqstannyń bastamasyn maquldady. Barsha halyqaralyq seriktesimizdiń, ásirese, Kaspıı aınalasyndaǵy kórshilerimizdiń jumysyn joǵary baǵalaımyz. Alaıda qolǵa alynǵan sharalar ázirge jetkiliksiz. Teńizdiń tartylý saldaryn jeńildetip, ekonomıka men ekojúıeniń ózgeristerge beıimdelýine kómektesý úshin úılesimdi áreketke kóshetin ýaqyt keldi, — dedi Memleket basshysy.
Aıta keteıik, buǵan deıin Memleket basshysy Qasym-Jomart Toqaev jıynǵa qatysýshylarǵa iltıpat bildirip, sammıtti oıdaǵydaı uıymdastyrǵany jáne qonaqjaılyq kórsetkeni úshin Túrikmenstan Prezıdenti Serdar Berdimuhamedovke alǵys aıtqanyn jazdyq.
