Prezıdent: Kaspııdiń sýyn saqtaý úshin birlesip áreket etýimiz kerek
ASTANA.KAZINFORM - Qasym-Jomart Toqaev Qazaqstan-Iran bıznes forýmynda Kaspıı teńizin jáne onyń ekojúıesin saqtap qalýǵa basa mán berdi. Bul týraly Aqordanyń baspasóz qyzmeti habarlady.
– Kaspıı teńiziniń taǵdyry – óte ózekti másele. Teńiz deńgeıiniń tómendep ketýi aımaqtyń ekologııasy men ekonomıkasyna keri áserin tıgizip otyr. Bárimizdi alańdatyp otyrǵan máseleni sheshý – bes eldiń ortaq mindeti. Bul iske halyqaralyq uıymdardy jáne qarjy ınstıtýttaryn tartqan jón. Men Shanhaı yntymaqtastyq uıymynyń keńeıtilgen otyrysynda Sý máseleleri jónindegi ortalyq qurý týraly usynys aıttym. Osy oraıda, Kaspııdiń sýyn saqtaý úshin memleketaralyq baǵdarlama qabyldap, birlesip áreket etýimiz kerek. Oǵan qosa, Qazaqstan delegatsııasy kelesi jyly Tegeranda ótetin VII Kaspıı sammıtine qatysýǵa nıet bildirip otyr. Elimiz aldaǵy eki jyldyń ishinde IV Kaspıı ekonomıkalyq forýmyn ótkizýdi usyndy. Atalǵan is-sharalar Kaspıı teńizine qatysty túıtkildi jan-jaqty qarap, tıimdi sheshim tabýǵa septigin tıgizedi. Irandyq áriptesterimizdi osy bastamalarǵa belsene atsalysýǵa shaqyramyz, – dedi Qasym-Jomart Toqaev.
Memleket basshysy jappaı tsıfrlandyrý úderisine aıryqsha kóńil bólý kerek ekenin atap ótti.
– Qazaqstanda tsıfrlyq ekonomıkany damytý úshin naqty sharalar qolǵa alynyp jatyr. Sondaı-aq jasandy ıntellekt tehnologııasyn keńinen qoldanysqa engizý úshin aýqymdy jumys istelýde. Aldaǵy úsh jyldyń ishinde naǵyz tsıfrlyq el bolamyz degen aıqyn maqsatymyz bar. Osyǵan oraı, aımaqta birinshi bolyp Jasandy ıntellekt jáne tsıfrlyq damý mınıstrligin qurdyq. Bıyl Qazaqstanda Ortalyq Azııadaǵy alǵashqy sýperkompıýter iske qosyldy. Alem.AI halyqaralyq jasandy ıntellekt ortalyǵy ashyldy. Budan bólek, biz Alataý qalasyn kórkeıtýge basa mán berip otyrmyz. Meniń Jarlyǵymmen Alataýǵa damý qarqyny ozyq qala mártebesi berildi. Bul joba krıptoındýstrııany, ınnovatsııany jáne tehnologııalyq bıznesti órkendetýge múmkindik beredi. Biz osy baǵytta Iran kompanııalarymen tyǵyz baılanys ornatamyz dep senemiz, – dedi Prezıdent.
Qasym-Jomart Toqaev Qazaqstan men Iran jańa yqpaldastyq kezeńine qadam basqanyn, elderimiz saýda, ınvestıtsııa, logıstıka jáne tehnologııa salalaryndaǵy ekonomıkalyq seriktestiktiń negizin qalap jatqanyn aıta kelip, bul forým eki el arasyndaǵy qarym-qatynasty damytýǵa aıryqsha serpin beretinine senim bildirdi.