Prezıdent Kaspi.kz negizin qalaýshy Vıacheslav Kım men Mıhaıl Lomtadzeni qabyldady

ASTANA. KAZINFORM – Qasym-Jomart Toqaev Kaspikz kompanııasynyń negizin qalaýshy Vıacheslav Kım men Mıhaıl Lomtadzeni qabyldady. Bul týraly Aqordanyń baspasóz qyzmeti málim etti. 

Prezıdentke Kaspikz kompanııasy qyzmetiniń nátıjeleri men shaǵyn jáne orta bıznesti damytýǵa arnalǵan jańa servıs qurý jospary jóninde málimet berildi.

«Memleket basshysyna usynylǵan aqparatqa sáıkes, búginde 700 myńǵa jýyq otandyq kásipker óz bıznesin Kaspikz tehnologııalarynyń kómegimen damytyp jatyr. Bıylǵy birinshi jartyjyldyqtyń ózinde taýarlar men qyzmetter úshin 12 trıllıon teńge kóleminde qolma-qol aqshasyz tólem jasalyp, 150 myń jeke kásipker tirkelgen», - delingen habarlamada. 

Memlekettik organdarmen birlesip ázirlengen onlaın-servısterdiń kómegimen qazaqstandyqtar salyqtardy merziminde tóleý múmkindigine ıe boldy. 2024 jyldyń 6 aıynda atalǵan qyzmetter arqyly bıýdjetke 1,1 trıllıon teńgeden astam salyqtar men basqa da tólemder túsken.

Qasym-Jomart Toqaev elimizdegi shaǵyn jáne orta kásipkerlikti órkendetýdiń mańyzdy ekenin atap ótip, Kaspikz aktsıonerlerine qoldaý bildirdi.